NG gemeente Lüderitz
Die NG gemeente Lüderitz is 'n gemeente van die Nederduitse Gereformeerde Kerk aan die suidelik kus van Namibië.
Die gemeente is op 7 Desember 1949 afgestig van die NG gemeente Bethanie. Dit is geleë in een van die droogste dele ter wêreld en die lidmate was met die afstigting baie yl verspreid. Die gemeente sluit die groot, uitgestrekte Diamantsperrgebiet in en aan die kus lê ook sowat 15 eilande binne die gemeente se grense. Die middelpunt van die gemeente is Lüderitz, voorheen Angra Pequena, waar Bartolomeus Dias sy eerste kruis opgerig het. Die gemeente bestaan uit karakoelboere, mynwerkers, ghwano-eilandbewoners, fabriekswerkers, geregsdienaars, spoorwegmense en andere. Die 550 lidmate van 1952 was so yl verspreid dat om een buitewyk van 15 huisgesinne te besoek, 'n totale reis van amper 1 400 km beteken het. Destyds is gereeld buitedienste op Aus, 130 km van die kus af, en op Oranjemund, amper 300 km van Lüderitz af, gehou. Oranjemund het in 1959 afgestig en ressorteer onder die Sinode van Wes-en-Suid-Kaapland en nié onder Namibië nie.
Agtien maande na die stigting het die gemeente reeds die voorreg gehad om die kerk op Lüderitz in te wy op 10 Junie 1950. Die gemeente se eerste leraar was ds. P.A.M. Brink, voorheen van die moedergemeente Bethanie.
[wysig] Enkele leraars
Philippus Albertus Myburgh Brink, 1950 - 1955
[wysig] Bronne
- Olivier, ds. P.L. (samesteller). 1952. Ons gemeentelike feesalbum. Kaapstad en Pretoria: N.G. Kerk-Uitgewers.
