NG gemeente Molteno

NG kerkgebou Molteno.

Molteno is slegs 20 km van Sterkstroom geleë en die gemeente het dan ook bekendgestaan as NG gemeente Molteno-Sterkstroom, tot die NG gemeente Sterkstroom in 1891 afgestig het, 'n dekade ná Molteno-gemeente se afstigting.

Ds. P.J.J.S. Els, leraar van 1936 tot 1941.

Ds. Jacobus Claassen, leraar van 1949 tot 1952.

Ds. Johan Nicolaas Wilhelm de Jager, leraar van 1966 tot hy sy emeritaat op 19 November 1968 aanvaar.

Die NG gemeente Molteno is 'n gemeente van die Nederduitse Gereformeerde Kerk op die hoogliggende Oos-Kaapse dorpie Molteno, vernoem na die eerste Kaapse eerste minister, sir John Molteno, kampvegter vir verantwoordelike regering.

Stigting

Die gemeente is in 1881 gestig en op 22 Julie daardie jaar vergader die eerste kerkraadslede, soos benoem deur die Ringskommissie van die Ring van Burgersdorp, onder voorsitterskap van ds. J.G.S. de Villiers, destyds predikant van die NG gemeente Tarkastad. Die eerste vergadering is op Sterkstroom gehou en die volgende dekade sou die vergaderings om die beurt daar en op Molteno self gehou word, totdat Sterkstroom in 1891 selfstandig geword het. Dit was weens die geografiese ligging van die gemeente wat die gesamentlike bearbeiding van die twee dorpies moeilik gemaak het het. Op die eerste vergadering is ook besluit dat die Heilige Nagmaal op Molteno bedien sou word.

Eerste leraar

In 1883 is prop. J.F. Marais as eerste predikant van die gemeente georden. Hy vertrek in 1899 na Dordrecht en in in September daardie jaar word hy opgevolg deur ds. A.J. Pepler.

Naas die stigting en eerste leraar, was die volgende mylpaal in die gemeente se bestaan, die bou van die nuwe kerk. Die kerkraad het dié besluit op sy vergadering van 18 Februarie 1899 geneem. Die fondse vir die nuwe kerk is hoofsaaklik ingewin deur middel van die tiendestelsel. In Mei 1905 lê ds. A.J. Pepler die hoeksteen en op 20 April 1906 wy die gemeente sy indrukwekkende en stewige kerkgebou in. Die gebou is opgerig op 'n straatblok wat altesaam 10 erwe beslaan. Die koste was destyds net £7 000. Hoe wel dit moeilik is om in hedendaagse geldwaarde om te skakel, is 'n goeie raaiskoot sowat R3,5 miljoen.

Latere verwikkelinge

Die latere pastorie is gebou tydens die dienstyd van ds. J.F. Botha (1925 - '35) en baie is ook indertyd vir sendingwerk gedoen, onder meer die stigting van die sendinggemeente. Dit was juis in die dae dat die gemeente noustrop getrek het vanweë die Groot Depressie. Die volgende klompie leraar was di. P.J.J.S. Els (1936-'41), D.P.M. Beukes (1941-'45), P. Combrinck (1946-'49) en J. Claassen van 1949 tot hy in 1952 na Port Elizabeth se moedergemeente vertrek.

Enkele leraars

• Ds. J.F. Marais, 1883 – 1899
• ds. A.J. Pepler, 1899 - ?
• P.J.J.S. Els, 1936 - 1941
• D.P.M. Beukes, 1941 – 1945
• Pieter Combrinck, 1946 - 1949
• Jacobus Claassen, 1949 - 1952
• Johan Nicolaas Wilhelm de Villiers, 1966 - 1968

Bronne

• Olivier, ds. P.L. (samesteller), 1952. Ons gemeentelike feesalbum. Kaapstad en Pretoria: N.G. Kerk-uitgewers.
• Raper, P.E., 1987. Dictionary of South African Place Names. Johannesburg: Lowry Publishers.