National Association for the Advancement of White People

in Wikipedia, die vrye ensiklopedie
Spring na: navigasie, soek

Die National Association for the Advancement of White People (NAAWP) ("Nasionale Vereniging vir die Vooruitgang van Blankes") is 'n blanke politieke organisasie in die Verenigde State, wat in 1980 deur die politikus David Duke gestig is. Sy naam is ontleen aan - en parodieer ook - die National Association for the Advancement of Colored People (NAACP). Die groepering is 'n voorstander van blanke separatisme, maar nie blanke oorheersing nie. Sy hoofkwartier is in Metairie, 'n voorstad van New Orleans (Louisiana).

Die NAAWP staan veral bekend vir sy opposisie teen regstellende aksie-programme, en die organisasie pleit ook vir 'n strenger handhawing van wet en orde. Dit steun onder meer die doodstraf en die sogenaamde three strikes-wette. Sy leuse is "Gelyke regte vir almal - besondere voorregte vir geeneen nie".

Sedert 1 Januarie 2005 verwys die NAAWP se webwerf na die organisasie as die National Association of Working People ("Nasionale Vereniging van Werkende Mense").

Aanhangers van die NAAWP beweer dat daar dubbele standaarde ten opsigte van die NAAWP en die NAACP gehandhaaf word. Terwyl die eersgenoemde as rassisties verwerp word, geniet die NAACP volle erkenning as 'n politieke organisasie van nie-blankes. Met die keuse van sy naam verwys die NAAWP egter ook na die NAACP as 'n suiwer rasgebaseerde organisasie.