Newa

Die Sint Petrus en Sint Paulus-fort aan die Newa-rivier in Sint Petersburg.

Die Newa-rivier (Russies: Нева́) is ’n rivier in Noordwes-Rusland wat van die Ladoga-meer deur die westelike deel van Leningrad-oblast en die stad Sint Petersburg na die Golf van Finland vloei. Hoewel dit nie baie lank is nie, is dit die derde grootste rivier in Europa in terme van sy gemiddelde uitmonding (naas die Wolga en die Donau).

Geografie

Die Newa is 74 km lank.. Altesaam 28 km hiervan is binne die stadsgrense van Sint Petersburg en die res is in die Leningrad-oblast. Dit vloei suidwes van die Ladoga-meer, bereik sy mees suidelike punt naby sy samevloeiing met die Tosna-rivier en draai dan noordwes en vloei uit in die Golf van Finland. Die rivier se gemiddelde breedte is 400-600 meter en die gemiddelde diepte 8-11 meter. Die Newa-stroomgebied sluit in die Ladoga en die Onega-meer, die twee grootste mere in Europa.

Van Desember tot vroeg in April vries die rivier en is dit nie vaarbaar nie..

Newa-delta

Die eilande in die historiese deel van Sint Petersburg in die Newa-delta word gevorm deur natuurlike sytakke sowel as mensgemaakte kanale. Die belangrikste sytakke is:

• Bolsjaja Newa
• Malaja Newa
• Bolsjaja Nefka
• Srednaja Nefka
• Malaja Nefka.

Die belangrikste eilande is:

• Wasilijefski-eiland
• Dekabristof-eiland
• Kamenni-eiland
• Krestofski-eiland
• Petrogradsk-eiland
• Jelagin-eiland

Geskiedenis

Oest-Izjora, waar die Geveg van die Newa na bewering in 1240 plaasgevind het.

In die Middeleeue was die wye rivier ’n belangrike verbinding tussen die Baltiese See en die Wolga-rivierroetes na die Ooste. Dis by die samevloeiing van die Newa en die Izjora-rivier waar die bekende maar swak gedokumenteerde Geveg van die Newa (1240) tussen die Swede en die Russe plaasgevind het. Aleksander Jaroslawitsj, prins van Nowgorod, het die geveg gewen en daarna die titel "Nefski" (van die Newa) aangeneem.

In die 16de eeu was die Sweedse fort Nyen aan die Newa geleë. Pieter die Grote het dit verwoes en die Sint Petrus en Sint Paulus-fort in 1703 daar gebou. Die fort, wat op die Zajatsji-eiland geleë is, word beskou as die eerste gebou in Sint Petersburg.

Verwysings

Hierdie artikel is merendeels vertaal vanaf die Engelse Wikipedia-artikel [1]

Eksterne skakel

• Newa-rivier (Russies)