Newton Park (kiesafdeling)

Newton Park was een van die drie nuwe kiesafdelings wat voor die algemene verkiesing van 1966 in Port Elizabeth geskep is. Die ander was Algoa en Walmer wat saam met Port Elizabeth-Noord en Port Elizabeth-Sentraal die vyf kiesafdelings in die vriendelike stad sou bly tot in 1994.

In die eerste verkiesing in 1966 wen Myburgh Streicher van die Verenigde Party gemaklik met 'n meerderheid van 4 159 teen die Nasionale Party se M. la R. van der Vyver. Hy behou die setel in die 1970-verkiesing vir die V.P. met 'n meerderheid van 4 003 bo die N.P. se J. de Jager, wat 3 316 stemme kry en die Progressiewe Party se J. Molyneux met 786 stemme. Streicher wen in 1974 die vierde keer agtereenvolgens, nou met 'n meerderheid van net 1 061 stemme bo die N.P. se L.S. Strydom, wat 4 264 stemme gekry het, en die P.P. se S.S. Schkolne met 1 378 stemme.

Op 19 Januarie 1977 skors die Verenigde Party ses Volksraadslede onder leiding van Streicher, toe Kaaplandse leier, omdat hulle geweier het om die planne vir 'n nuwe party, wat uit die Progressiewe Reformiste Party, Demokratiese Party (1973) en Verenigde Party se lede sou bestaan, te steun. Dit was almal lede van die regtervleuel in die V.P., die sogenaamde Ou Garde. Hulle het gevolglik die Onafhanklike Verenigde Party op 26 Maart 1977 gestig, wat met ingang 28 Mei 1977 die Suid-Afrikaanse Party geword het. In die verkiesing van 1977 het die party in twee setels, naamlik Port Elizabeth-Sentraal en Walmer, asook Simonstad gewen. Streicher was die SAP-kandidaat in Wynberg, maar het verloor.

Van 1977 af was Newton Park 'n veilige N.P.-vesting.

Sien ook[wysig | wysig bron]

Bronne[wysig | wysig bron]

Potgieter, D.J. (ed.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.

Sien ook[wysig | wysig bron]

Newtonpark