Nigel Farage

in Wikipedia, die vrye ensiklopedie
Spring na: navigasie, soek
Nigel Farage
Nigel Farage

Leier van die Verenigde Koninkryk se Onafhanklikheidsparty (UKIP)

Lid van die Europese Parlement
Ampsbekleër
Ampsaanvaarding
November 2010
Voorafgegaan deur Lord Pearson of Rannoch

Persoonlike besonderhede
Gebore 3 April 1964 (1964-04-03) (50 jaar oud)
Kent, Engeland, Verenigde Koninkryk
Politieke party UKIP
Eggenoot/eggenote Gráinne Hayes (1988-1997, geskei)
Kirsten Mehr (sedert 1999)
Kind(ers) Vier
Alma Mater Dulwich-kollege

Nigel Paul Farage [ˈfærɑːʒ] is 'n Britse politikus en leier van die Verenigde Koninkryk se Onafhanklikheidsparty (UK Independence Party, UKIP), 'n pos wat hy al tussen September 2006 en November 2009 beklee het. Hy is 'n lid van die Europese Parlement as afgevaardigde vir die kiesafdeling Suidoos-Engeland asook die mede-voorsitter van die Euroskeptiese Europe of Freedom and Democracy-groep.

Farage het die Konserwatiewe Party in 1992 ná die ondertekening van die Maastricht-verdrag verlaat om 'n stigtingslid van die UKIP te word. Hy was onsuksesvol in die Europese en Britse verkiesings sedert 1994, maar het uiteindelik in die verkiesings vir die Europese Parlement in 1999 'n setel as afgevaardigde vir Suidoos-Engeland gewen nadat 'n stelsel van streeksgebonde kandidatelyste ingevoer is. Farage is in 2004 en 2009 herverkies.

In September 2006 is Farage as leier van die UKIP aangewys en het dié party se verkiesingsveldtog vir die Europese Parlementsverkiesing in 2009 gevoer. Die UKIP het betreklik goed in die verkiesing gevaar en die tweede sterkste party geword met twee miljoen van die uitgebragte stemme, nog voor die Arbeidersparty (Labour) en die Liberale Demokrate. In November 2009 het Farage as UKIP-partyleier bedank om in die Britse algemene verkiesing van 2010 teen die destydse speaker van die Britse Laerhuis, John Bercow, in die Buckingham-kiesafdeling te staan. Farage was onsuksesvol in dié poging en kon slegs die derde hoogste persentasie van die uitgebragte stemme op hom verenig. Kort nadat verkiesingslokale op 6 Mei 2010 geopen het, is Farage in 'n vliegtuigongeluk in Nottinghamshire beseer.

In November 2010 is Farage weer as leier van die UKIP aangewys nadat die vorige voorsitter, Lord Pearson of Rannoch, bedank het. Farage het veral bekendheid met sy vurige en soms ook omstrede toesprake in die Europese Parlement verwerf.

Eksterne skakels[wysig]

Commons-logo.svg
Wikimedia Commons het meer media verwant aan:
Nigel Farage (kategorie)