Nordenham

in Wikipedia, die vrye ensiklopedie
Spring na: navigasie, soek

Nordenham
2012-05-13 Nordsee-Luftbilder DSCF8517.jpg

Kaart Wapen
Nordenham in BRA.svg
Wappen-Nordenham.png
Vlag
Flag of None.svg
 Land Flag of Germany.svg Duitsland
 Deelstaat Flag of Lower Saxony.svg Nedersakse
 Koördinate 53°29′N 8°29′O
 Stigting 789 (eerste verwysing)
 Stadstatus 1 Mei 1908
 Oppervlak:  
 - Totaal 87,2 vk km
 Hoogte bo seevlak 2 m
 Bevolking:  
 - Totaal (31 Desember 2011) 26 706
 - Bevolkingsdigtheid 306/vk km
 Tydsone UTC +1 (MET)
 - Somertyd UTC +2
 Burgemeester Hans Francksen (SPD)
 Amptelike Webwerf www.nordenham.de

Nordenham [nɔʁdənˈham] is 'n stad in die administratiewe distrik Wesermarsch (Duits: Landkreis Wesermarsch) van die Noord-Duitse deelstaat Nedersakse met 'n oppervlakte van 87,2 vierkante kilometer en 26 706 inwoners (2011). Die stad is op die skiereiland Butjadingen naby die monding van die Weserrivier in die Noordsee aan die rivier se westelike oewer en teenoor die hawestad Bremerhaven aan die regteroewer geleë. Nordenham se Midgard-seehawe is die grootste Duitse hawe van sy soort in privaatbesit, terwyl die plaaslike Airbus-fabriek in die stadsbuurt Einswarden komponente vir die rompe van Airbus-stralers vervaardig.

Geskiedenis[wysig]

'n Standbeeld herinner aan die stigter van Nordenham, Wilhelm Müller

Alhoewel die huidige stadswyk Blexen reeds sowat 1 200 jaar gelede gestig is, het die huidige stad danksy die inisiatief van die koopman Wilhelm Müller in 1908 ontstaan. Reeds in 1857 het Müller die redery Norddeutscher Lloyd oorreed om vee vanaf die skiereiland Butjadingen na Engeland te vervoer, en die sogenaamde Ochsenpier is as die eerste hawehoof aangelê wat vinnig ook deur passasierskepe op pad na Bremen en Bremerhaven gebruik is.

Ekonomie[wysig]

Seekabels[wysig]

Cyrus W. Field

In 1866 het die Amerikaner Cyrus W. Field daarin geslaag om die eerste Transatlantiese seekabel tussen Europa en Noord-Amerika in bedryf te stel wat 'n telegrafiese verbinding tussen die twee vastelande geskep het. Dit was die prototipe vir die huidige onderseese kabelverbindings wat vir kommunikasie of dataoordrag gebruik word. In teenstelling met Field se prototipe beskik huidige kabels in plaas van 'n koperkern oor 'n bundel van optiese vesels wat die impulse lei. Amerikaans-vervaardigde optiese veselspoele, wat in Nordenham verwerk word, bevat kabels met 'n lengte van tot by 400 kilometer.

Die plaaslike maatskappy Norddeutsche Seekabelwerke is in 1899 as die oudste onderneming van Nordenham gestig en vervaardig tans see- en spesiaalkabels vir oopsee-nywerhede. Die maatskappy was ook by die daarstel van ARCOS-1 (die Americas Region Caribbean Optical Ring System) betrokke, 'n optiese veselseekabel sonder versterkers wat oor 'n afstand van sowat 9 000 kilometer 24 landingspunte in 15 Karibiese lande met mekaar verbind.

Titaandioksied[wysig]

Die maatskappy Kronos-Titan verwerk Ilmeniet, 'n titaanerts wat uit Suid-Noorweë ingevoer word, tot titaandioksied, 'n spierwit pigment wat vir die vervaarding van verwe, lak, kunsstowwe en spesiaalpapier benodig word.

Airbus[wysig]

Die Airbus-fabriek in die stadsbuurt Einswarden vervaardig in sy geoutomatiseerde aanleg 140 verskillende rompkomponente vir straalvliegtuie, waaronder ook die Airbus A380, wat via die Midgard-seehawe in spesiale reusehouers na die Airbus-fabriek in Hamburg-Finkenwerder vervoer word.

Die Midgard-hawe[wysig]

Die Midgard-seehawe met sy geriewe naby die stadsentrum is in privaatbesit en word deur die maatskappy Rhenus Midgard met 170 medewerkers beheer. Die hawe hanteer naas komponente vir Airbus-stralers ook massavrag-goedere soos steenkool, ertse en hout.

Bronne[wysig]

  • DreiStromLand. Ems - Weser - Elbe. Hamburg: edition Nordwest im Europa-Verlag 2005, bl. 38-41

Eksterne skakels[wysig]