North Shore City

in Wikipedia, die vrye ensiklopedie
Spring na: navigasie, soek
North Shore City
'n Uitsig oor North Shore City, met Auckland in die agtergrond
Ligging
Kaart van Nieu-Seeland se Noordeiland
Die metropolitaanse gebied van Auckland. North Shore City word in oranje aangedui
Basiese gegewens
Stigting: 1840's
Bevolking: 205 605 (2006)
Oppervlakte: 129,81 km²
Bevolkingsdigtheid: 1 583,9 inwoners/km²
Gemiddelde inkomste: NZ$ 29 100 (2006)
Geografiese ligging: 36°48′S 174°45′O
Tydsone: NSST (UTC+12)
Somertyd: UTC+13
Internet: North Shore City
Administratiewe verdeling
Staat: Nieu-Seeland
Administratiewe gewes: Auckland
Setel van Stadsraad (City Council):

Takapuna

North Shore City, wat informeel gewoonlik net North Shore of The Shore genoem word, is 'n stad in die administratiewe gewes Auckland op Nieu-Seeland se Noordeiland. Met 'n bevolking van 205 605 volgens die sensus van 2006 - wat in 2008 volgens skattings tot meer as 223 000 gegroei het - is North Shore City tans die vierde grootste stad in Nieu-Seeland, sowel ten opsigte van sy inwonerstal asook sy oppervlakte van 129,81 vierkante kilometer. Sy kuslyn het 'n totale lengte van 141 kilometer.

As een van vier stede in die metropolitaanse gebied van Auckland het North Shore City 'n sterk stedelike en voorstedelike karakter en is tans ook die mees digbevolkte stad in Nieu-Seeland. Die stad het 'n relatief groot gemeenskap van Suid-Afrikaanse immigrante.

Geskiedenis[wysig]

Aan die voet van die ou vulkaan Mount Victoria in die stadsgebied van North Shore City het reeds voor die aankoms van die eerste Europese setlaars 'n versterkte Māori-nedersetting (pa) van die plaaslike Kawerau-stam ontstaan. Oorblyfsel van hierdie dorp se terrasse, wat vroeër met palisades en skerp houtpale beskerm is, kan nog steeds besigtig word.

Teen die 19de eeuwisseling was daar klein nedersettings in Devonport, Takapuna en Northcote. Devonport was die eerste nedersetting op die North Shore en het aanvanklik as Flagstaff bekend gestaan - afgelei van die seinstasie wat op die piek van Mount Victoria opgerig is.

In 1840 het leidende Māori-stamhoofde en verteenwoordigers van die Britse Kroon die Verdrag van Waitangi onderteken - 'n ooreenkoms wat as die stigtingsdokument van die moderne Nieu-Seelandse nasie beskou word. In North Shore City is die eerste land een jaar later deur die plaaslike hapu van Ngati Paoa aan verteenwoordigers van die Kroon oorhandig. Tot in 1843 is die belangrikste hoofpaaie as basis vir die gebied se vroeë ontwikkeling reeds aangelê.

Die stadige ontwikkeling van Takapuna en Devonport het in die 1850's begin. Landprojekte in die gebied het steeds meer setlaars en beleggers gelok, en in 1854 is die eerste veerbootdiens met walvisbote in die hawe ingestel. Later is die veerbootmaatskappy Devonport Steam Ferry gestig.

In die loop van die 19de eeu het North Shore met boumateriale, skeepsbou en die houtbedryf as sy ekonomiese basis verdere groei getoon. Die gebied het daarnaas tot 'n gewilde ontspanningsgebied vir Aucklanders ontwikkel sodat 'n plaaslike hotelbedryf vanaf die laat 1870's begin ontwikkel het. Die vinnige groei van Auckland se binnestad in die laat 1870's en vroeë 1880's het ook North Shore se ekonomie aangewakker.

Nogtans was North Shore se groei stadig in vergelyking met ander nabygeleë stedelike gebiede. Eers met die inwyding van Auckland se nuwe hawebrug in 1959, waardeur 'n regstreekse verbinding met die stadsentrum van Auckland City geskep is, het North Shore maklik toeganklik geword en grootskaalse ontwikkeling van plaaslike nywerhede en woongebiede bevorder. As die vierde grootste stad in die land handhaaf North Shore City sy sterk groeikoers ook in die 21ste eeu.