Olivier (voornaam)

in Wikipedia, die vrye ensiklopedie
Spring na: navigasie, soek

Olivier is die Normandies-Franse, Nederlandse en Afrikaanse vorm van 'n oorspronklik Germaanse manlike voornaam, wat in Oudnoors as Anleifr of Olafr bestaan het en sy etimologiese wortels in Oudnoors an* "voorvaders" en leifr "oorblyfsel; seun" het. Die voornaam sou dus "seun van die voorvaders" beteken. Die vroulike ekwivalente van die voornaam is Olivia en Olly.

'n Ander afleiding verwys na die Latynse oliva "olyf(boom), olyftak" en olivarius "olyfboomplanter". Aangesien die olyfboom in die antieke tydperk as 'n simbool van vrede beskou is, sou die Latynse betekenis van die naam "vredebrenger" wees.

Die voornaam het onder die invloed van die Karolingiese epiek, veral die Karelromans en die beroemde Rolandslied, waarin Olivier een van Roland se paladyne is, reeds vroeg in die Middeleeue baie gewild geraak. Ouers het dikwels twee van hulle seuns Roland en Olivier genoem.

Die voornaam word dessdae in Nederland, Vlaandere, Suid-Afrika en Namibië min gebruik, maar is nog steeds gewild in Franstalige gebiede soos Frankryk, Wallonië, Wes-Switserland en Québec.

Die Duitse vorm Oliver is in Duitsland ná die Tweede Wêreldoorlog gebruik, terwyl die Engelse Oliver wél in William Shakespeare se komedie As You Like It voorkom, maar later moontlik onder die invloed van Oliver Cromwell nouliks aan kinders gegee is en eers in die 19de eeu met Charles Dickens se Oliver Twist weer opgekom het.

Variante[wysig]

  • Nederland, Vlaandere: Fier, Oluvier
  • Engelse taalgebied: Ol, Ollie
  • Skotland: Olaghair

Verwysings[wysig]

  • Van der Schaar, Dr. J.: Woordenboek van voornamen. 13de druk. Utrecht/Antwerpen: Uitgeverij Het Spectrum 1983