Oranjerivierprojek

in Wikipedia, die vrye ensiklopedie
Spring na: navigasie, soek
Die Gariepdam, die grootste dam in Suid-Afrika, is 'n integrale deel van die Oranjerivierprojek.

Die Oranjerivierprojek (ook bekend as die Oranjerivierskema) is 'n groot projek met die hoofdoelwit: die ekonomiese ontwikkeling van die Oranjerivier en sy takriviere. Die projek is aanvanklik beplan oor 'n tydperk van 30 jaar. Daar is reeds gedurende 1956 begin met die opnames, in 1962 is die projek deur die Parlement goedgekeur en die werk het begin gedurende 1963.[1]

Die projek sluit in besproeiingontwikkeling, hidroëlektrisiteit en die verlegging van bestaande riviere deur middel van tonnels en kanale. Daar is beplan vir 'n opwekkings vermoë van 177 000 kW hidroëlektrisiteit. Daar is ook beplan vir 'n tonnel (Oranje-Visrivier) om water van die Gariepdam na die Groot-Visrivier oor te plaas.[2]

Ander gedeeltes van die projek is die bou van die Gariep en Vanderkloofdam en die Vanderkloofkanale.

Oranje-Visrivier Tonnel[wysig]

Die Oranje-Visrivier Tonnel is 82.5 km lank en lewer water van die Oranjerivier aan die Groot-Visrivier teen 'n tempo van 57 m3/s. Die tonnel het 'n diameter van 5.35 m en 200 000 m3 beton was gebruik om die tonnel te bou. Die inlaattoring (30°41′26″S 25°45′46″O ) van die tonnel is by Oviston in die Gariepdam. Hiervandaan volg dit 'n suidelike roete onderdeur die Suurbergplato verby Steynsburg. Die tonnel mond uit by 31°25′22.5″S 25°38′14″O in die Teebusspruit, net suid van Teebuskoppie. Hiervandaan vloei die water met die Grootbrakrivier verder na die Groot-Visrivier.[3]

Visrivier-Sondagsrivier Oordrag Skema[wysig]

Teks geleen uit artikel Groot-Visrivier.

Water oorgedra vanaf die Oranjerivier na die Groot-Visrivier via die Oranje-Visrivier tonnel word weggekeer uit die Groot-Visrivier by die Elandsdriftkeerwal in 'n kanaal wat vir 65 km kronkel saam met steil hellings en uitmond in die Klein-Visrivier. Die kanaal vloei deur die Cookhousetonnel van 13.1 km wat deur die Bosberg sny tussen Cookhouse en Somerset-Oos. Die water vloei vir 40 km in die Klein-Visrivier tot by die De Mistkraalkeerwal. Hier word word die water uitgekeer in die Skoenmakerskanaal (vermoë 22m3/s) wat uiteindelik uitmond in die Volkerspruit wat op sy beurt vloei na die Darlingtondam in die Sondagsrivier. Van hier word dit na Port Elizabeth gepomp.

Voltooiing[wysig]

Die Gariepdam is gedurende 1971, die tonnel gedurende 1975 en die Vanderkloofdam gedurende 1977 voltooi.

Verwysings[wysig]

  1. Ensiklopedie van Suidelike Afrika, Eric Rosenthal,Bl 363, 1967
  2. Op Pad in Suid-Afrika. B.P.J. Erasmus. Bl 312. 1995. ISBN 1-86842-026-4
  3. http://www.halcrow.com/Who-we-are/film_archive/Orange-River-Tunnel-lining-film/