Ortodokse Kerk in Amerika
Die Ortodokse Kerk in Amerika is ’n onafhanklike Oosters-Ortodokse Kerk in Noord-Amerika wat in volle gemeenskap met die ander Oosters-Ortodokse kerke is, hoewel nie almal sy onafhanklikheid aanvaar nie. Die primaat van die kerk het die titel Aartsbiskop van Washington, Metropoliet van die Hele Amerika en Kanada. Die Kerk se hoofkantoor is in Syosset, New York, en bestaan uit meer as 700 gemeentes, sendings, gemeenskappe en kloosters hoofsaaklik in die VSA en Kanada, met bykomende gemeentes en sendings in Mexiko en Australië. Skattings van die aantale lidmate wissel tussen 27 169 en 1 064 000.
[wysig] Geskiedenis
Die Kerk se geskiedenis het in 1794 begin met die aankoms van agt Russies-Ortodokse monnike op Kodiak-eiland, Alaska, wat toe deel van Rusland was. Hulle het ’n Christelike sending in Alaska gestig wat ’n gemeente van die Russiese Kerk geword het ’n paar jaar nadat die VSA Alaska in 1867 van Rusland gekoop het. Teen die laat 19de eeu het die Russies-Ortodokse Kerk in ander dele van Amerika gegroei danksy die aankoms van immigrante uit dele van Europa en die Midde-Ooste. Al die mense van verskillende etnisiteite is saamgesnoer in ’n enkele Noord-Amerikaanse gemeente van die Russiese Kerk.
Weens die groot ontwrigting wat die Russiese Rewolusie van 1917 meegebring het, het patriarg Tichon van Moskou in 1920 opdrag gegee dat Russies-Ortodokse kerke buite Rusland beheer van hulle eie kerke neem indien die sentrale administrasie buite aksie gestel word of nie gekontak kan word nie.[1] Sommige van die kerke het dit gebruik as basis vir onafhanklikheidsverklarings sonder dat die sentrale administrasie buite aksie gestel is. Hoewel sommige etniese gemeentes by ander Ortodokse kerke aangesluit het, het baie ander gemeentes in 1924 die selfregerende Russies-Ortodokse Grieks-Katolieke Kerk in Amerika gestig.
In 1970 het die Russiese Kerk die onafhanklikheid van die Russies-Ortodokse Grieks-Katolieke Kerk in Amerika erken en dit is hernoem na die Ortodokse Kerk in Amerika. Hoewel al die Oosters-Ortodokse Kerke nie die Amerikaanse kerk se onafhanklikheid erken nie, is die kerk in volle gemeeenskap met hulle.
[wysig] Verwysings
- Constance J. Tarasar (red.) Orthodox America: The Orthodox Church in America Syosett, New York 1975
