Skerwegerig

in Wikipedia, die vrye ensiklopedie
(Aangestuur vanaf Ostrakisme)
Brokstukke van erdeware wat as stemlotjies gebruik is. Die genomineerde persone is Perikles, Kimon en Aristides, elk met sy patroniem (van bo na onder).

Skerwegerig, ook bekend as ostrasisme[1] (Grieks: Εξωστρακισμός, exo (uit)-ostrakismos) was 'n prosedure van die Atheense demokrasie waarin enige landsburger uit die stadstaat Athene verban kon word vir tien jaar. Terwyl daar by sekere gevalle duidelik publieke gramskap jeens die slagoffer geheers het, is skerwegerig ook as voorsorgmaatreël gebruik. Dit is aangewend om groot konfrontasies te ontlont tussen wedywerende politici (deur een van hulle van die toneel te verwyder), of vir verbanning van 'n potensieële tiran.

Sodoende is iemand wat as 'n bedreiging vir die staat beskou is geneutraliseer. Van deurslaggewende belang is dat daar geen verband tussen skerwegerig en regsgerig was nie. Daar was geen aanklag of verdediging nie, en die verbanning was nie 'n daadwerklike strafmaatreël nie; dit was bloot 'n bevel van die Atheense bevolking dat een van hul getal vir tien jaar afwesig moes wees.

Die maatreël moet onderskei word van die moderne gebruik van die terme "ostraseer" of "ostrakeer", wat oor die algemeen verwys na informele uitsluitingswyses van 'n groep deur vermyding. 'n Sosiaal antropologiese voorbeeld van skerwegerig is die voor-koloniale Australiese aboriginale sosiale ekspulsie van stamlede, wat soms selfs tot die dood gelei het.

Verwysings[wysig | wysig bron]

  1. van Rooy, C.A. (1980). Antieke Griekse Geskiedenis. Durban, Pretoria: Butterworth. p. 407. ISBN 0-409-08017-9.