Otjimbingwe

in Wikipedia, die vrye ensiklopedie
Spring na: navigasie, soek
Otjimbingwe
Poeier-toring in Otjimbingwe
Poeier-toring in Otjimbingwe
Ligging van Otjimbingwe op 'n kaart (Namibië)
Otjimbingwe
Otjimbingwe
Koördinate: 22°21′27″S 16°07′43″O Koördinate: 22°21′27″S 16°07′43″O
Land Vlag van Namibië Namibië
Streek Erongo
Distrik Karibib
Gestig op 11 Julie 1849
Bevolking (2010)
 - Stad 15 000
Tydsone WAT (UTC+1)
 - Somer (DST) WAST (UTC+2)
Skakelkode(s) 64

Otjimbingwe was die eerste setel van die Duitse bewind in die teenswoordige Namibië, destyds Duits-Suidwes-Afrika, maar nadat die administrasie in 1892 met die voltooiing van die Alte Feste na Windhoek verskuif het, het dit 'n rustige en afgeleë sentrum geword. Volgens die huidige indeling val dit in die Erongostreek. Die beraamde inwonertal in 2010 was net meer as 15 000.[1]

Geskiedenis[wysig]

Rynse Sendingkerk in Otjimbingwe

Die Rynse Sendinggenootskap het die nedersetting as middelpunt vir hulle Namibiese bedrywighede van 1849 af gebruik. Johannes Rath en sy gesin vestig hulle op 11 Julie 1849 daar en in 1864 word dit 'n amptelike nedersetting. Die Rynse kerk, wat van 1867 dateer, is vandag nog een van die plekkie se vernaamste aantreklikhede.

Koper is in 1855 in die nabygeleë Khomashoogland ontdek en die Walvisbaai-mynmaatskappy het sy hoofkantoor op Otjimbingwe gevestig. Die koper is egter reeds teen 1860 uitgeput sodat die geboue in onbruik verval het.

Onder beheer van rykskommissaris dr. Ernst Heinrich Göring word die nedersetting laat in die dekade na 1880 die setel van die Duitse administrasie. (Göring se seun, veldmaarskalk Hermann Göring, is terloops in 1893 gebore terwyl sy vader met tuisverlof was en het wêreldwye berugtheid verwerf as stigter van die Gestapo voor die Tweede Wêreldoorlog en die uitvinder van die konsentrasiekampe waarin miljoen Jode, gays, Sinti en Roma en ander "ongewenste mense" uitgewis is.)

Vanweë opstande deur die inheemse bevolking moes die regeringsetel twee maal na Walvisbaai verskuif word, maar nadat die Schutztruppe aldaar aangeland het en hulle op Otjimbingwe gestasioneer is, het die nedersetting hom gevestig as "Hauptstadt von Deutsch-Südwest". Hier is in 1888 die eerste poskantoor opgerig en die eerste seëls, met die stempel "Otyimbingue", uitgereik.

Die administrasie het egter teen 1892 geheel en al na Windhoek verskuif en die spoorlyn tussen Swakopmund en Windhoek, wat kort na 1900 voltooi is, het Otjimbingwe verbygegaan. Dié twee faktore het spoedig tot die nedersetting se verval bygedra.

Verwysings[wysig]