Périgord
Périgord (Oksitaans Peiregòrd / Perigòrd) is 'n historiese provinsie en landskap in die suidweste van Frankryk wat vir sy ryk kulturele erfenis, kookkuns en sy gematigde klimaat bekend staan. Sy naam is afgelei van 'n antieke Keltiese stam, die Petrocorii.
Périgord was oor 'n lang tydperk 'n graafskap van die Middeleeuse Frankryk. As 'n grensgebied was dit in die 14de en 15de eeu 'n omstrede streek in die Honderdjarige Oorlog tussen Frankryk en Engeland en is uiteindelik in 1607 deur Hendrik IV met die Franse Kroon verenig. Périgord se argitektoniese erfenis sluit talle Middeleeuse en Renaissance-kastele in, waaronder Puymartin, Beynac, Losse en Hautefort wat merendeels langs die Dordogne- en Vézère-riviere geleë is. Ander beroemde kastele in die streek is Jumilhac le Grand, Fénelon, Biron, Bourdeilles, Castelnaud, Puyguilhem en Rouffiac.
Die grense van Périgord het in die afgelope 2 000 jaar nouliks verander - die gebied strek in 'n teoretiese radius van 100 kilometer rondom die hoofstad Périgueux. Sy bewoners word in Frans Périgordins genoem. Die grondgebied van Périgord kom ooreen met die huidige département Dordogne (wat die noordelike deel van die administratiewe gewes Akwitanië vorm) en word verder verdeel in vier streke - Périgord Noir (die Swart Périgord), Périgord Blanc (die Wit Périgord), Périgord Vert (die Groen Périgord) en Périgord Pourpre (die Purper Périgord).
Die geografiese besonderhede en landskapsvorme maak van Périgord een van die mees ongerepte dele van Frankryk. Die nuutgestigte natuurpark Parc Naturel Régional Périgord-Limousin is 'n poging om die plaaslike natuurlandskap vir die nageslagte te bewaar.
Fynproewers in Frankryk en elders vereenselwig die naam Périgord met agrariese produkte van baie hoë gehalte soos eende- en gansvleis (waaronder die beroemde pâté de foie gras of ganslewerpatee), truffels en wyne (soos die befaamde rooi en wit Bergerac- en Monbazillac-wyne).
Die historiese hoofstad en huidige prefektuur of administratiewe setel van Dordogne, Périgueux, het 'n lang en ryk geskiedenis. Dit staan nie alleen bekend vir sy antieke Romeinse bouvalle wat gerestoureer is nie, maar na die hele gebied word vanweë die groot aantal prehistoriese plekke selfs as "bakermat van die mensdom" verwys. Die bekendste besienswaardigheid is die grotte van Lascaux met hul prehistoriese rotsskilderye wat oerosse, perde, wild en ander diere uitbeeld - maar geen mense nie. Hulle is sowat 17 000 jaar oud.