Paulpietersburg

Paulpietersburg
Paulpietersburg
Koördinate: 27°25′″S 30°49′″O
Land	Suid-Afrika
Provinsie	KwaZulu-Natal
Distriksmunisipaliteit	Zululand
Plaaslike Munisipaliteit	eDumbe
Stigting	1888
Hoogte	1 128 m (3 701 vt)
Bevolking (2010)
- Stad	8 771
Tydsone	SAST (UTC+2)

Paulpietersburg is 'n dorp in die noorde van KwaZulu-Natal, Suid-Afrika. Die dorp het 'n bevolking van 8 771 in 2010 gehad en is vernoem na Paul Kruger en Piet Joubert.

Geskiedenis

Paulpietersburg, saam met Vryheid en Utrecht, was eens op 'n tyd by die Zuid-Afrikaansche Republiek ingelyf. Paulpietersburg was ook op 'n tyd by Zoeloeland ingelyf. Die dorp is in 1888 deur HJ Maarschalk opgemeet as deel van die Zuid-Afrikaansche Republiek. Die oorspronklike naam was Paulpietersrust. Diè naam is later na Paulpietersdorp verander en in 1896 na Paulpietersburg. Met die uitbreek van die Tweede Vryheidsoorlog was daar 20 gesinne in die dorp. Die dorp is na die oorlog by KwaZulu-Natal ingelyf. Die dorp het in 1958 munisipale status verower.

Distrik

Die distrik is 1 414 km² groot en waterryk met reënval van tot 1 000mm per jaar. Gemengde boerdery word beoefen - vleis- en melkbeeste, mielies, sorghum, grondbone en peulplante. Daar is ook groot bloekom-, denne- en wattelplantasies in die distrik.

Geografie

Die dorp lê op die oostelike rand van die Drakensbergeskarp. Die Makateeskop (1 737m) in die weste en Dumbe (1 526m) in die suidooste oorheers die omgewing. Dumbe is afgelei van die Zoeloewoord madumbe wat die Zoeloe naam is vir 'n aartappelagtige knol wat op die berg groei.

Sien ook

• Lys van dorpe in Suid-Afrika

Bronne

• Op Pad in Suid-Afrika. BPJ Erasmus. 1995. ISBN 1-86842-026-4
• Ensiklopedie van Suidelike Afrika. Eric Rosenthal. 1967.