Petrus Swart
| Petrus Swart | |
| Naam | Petrus Hermanus Jacobus Swart |
|---|---|
| Geboorte | 9 Julie 1913 Kestell |
| Sterfte | 11 Oktober 1977 (64 jaar oud) Bloemfontein |
| Kerkverband | Nederduits Gereformeerd |
| Gemeente(s) | Rondebosch Die Vlakte Bethanie Soutpan Otjiwarongo Hertzogville |
| Jare aktief | 1938-1975 |
| Kweekskool | Stellenbosch |
Ds. Petrus Hermanus Jacobus Swart (9 Julie 1913 distrik Kestell – 11 Oktober 1977 in Bloemfontein) was leraar in die Nederduitse Gereformeerde Kerk, onder meer die eerste leraar van die NG gemeente Die Vlakte ná dit in 1939 van NG gemeente Rondebosch afstig.
Swart is in 1913 in die distrik Kestell in die Vrystaat gebore, maar op vroeë leeftyd verhuis die gesin na Ventersburg, waar hy sy skoolopleiding voltooi en daarna vir sy voorbereidende studie na die destydse Universiteitskollege van die Oranje-Vrystaat gaan. Sy teologiese opleiding ontvang hy aan die Kweekskool op Stellenbosch en word in 1938 gelegitimeer.
Hy word dadelik hulpprediker in die NG gemeente Rondebosch en toe die NG gemeente Die Vlakte van die moedergemeente afstig, word hy op 5 Augustus 1939 die nuwe gemeente se eerste leraar. Hy bly in Kaapstad tot 1944 en bedien daarna Bethanie in Suidwes-Afrika, Soutpan (1949) in die Vrystaat, Otjiwarongo (1956) en toe vanaf 1960 Hertzogville, waar hy bly tot hy op 18 Januarie 1975 moet emeriteer wees verswakte gesondheid. Daarna help hy egter nog in verskeie gemeentes in Bloemfontein, waar hy gaan woon het, en elders.
Hy was die eerste aktuarius van die nuwe Sinode van Suidwes-Afrika, wat op 5 Maart 1957 selfstandig geword het. Buiten sy werk in verskeie kommissies in rings- en sinodale verband, dien hy ook in die Raad van die Kerke, voorloper van die eerste Algemene Sinode in 1962.
[wysig] Bron
- Maree, W.L., Jaarboek van die Nederduitse Gereformeerde Kerke 1979. Braamfontein: Tydskriftemaatskappy van die Nederduitse Gereformeerder Kerk, 1978.
