Raymond Ackerman

Raymond Ackerman (gebore 10 Maart 1931) is 'n Suid-Afrikaanse sakeman wat die Pick 'n Pay supermark-groep vanaf sy stigter, Mnr Jack Goldin (latere stigter van die Clicks-groep) oorgekoop het. Raymond Ackerman was voorsitter totdat hy in 2010 uitgetree het. Hy is ook bekend vir sy filantropiese aktiwiteite. Hy het in die sestigerjare vier winkels van Jack Goldin gekoop.

Lewensloop

Nadat hy in Koophandel van die Universiteit van Kaapstad gradueer, begin hy in 1951 op die ouderdom van 20 by die Greatermans-groep in die Ackermans-afdeling as 'n opleidingsbestuurder te werk. Ackermans is net na die Tweede Wêreldoorlog deur sy pa, Gus, gesig. Ackermans is egter in 1940 aan die Greatermans-groep verkoop.

Ackerman is uiteindelik 'n posisie by Greatermans se hoofkantoor in Johannesburg aangebied. In die vroeë 1950's begin supermarkte wat kos verkoop in Suid-Afrika op die toneel te verskyn. Norman Herber, die voorsitter van Greatermans besluit om 'n supermark met die naam Checkers te begin. Ackerman is uiteindelik in beheer van Checkers aangestel, en maak 'n reuse sukses van die besigheid.

Ackerman wen in 1965 die Outstanding Young South African-toekenning saam met Gary Player, en teen 1966, op die ouderdom van 35 was hy die besturende direkteur van 85 Checkers winkels, maar hy word in dieselfde jaar afgedank. In reaksie hierop gebruik hy sy skeidingsloon en 'n banklening om vier winkels in Kaapstad te koop wat onder die naam Pick 'n Pay handel dryf. Onder sy leiding groei Pick 'n Pay uiteindelik tot een van Afrika se grootste supermark-kettingwinkels, met 'n omset van sewe-en-dertig miljard Rand in 2006, met meer as 124 supermarkte, 14 hypermarkte en 179 konsessiebesighede. Meer as 30 000 mense werk vir die Pick 'n Pay-groep in verskeie lande regoor Suidelike Afrika en Australië.

Ackerman het verskeie kere met die Suid-Afrikaanse regering gebots (beide voor en na 1994) ter afskaffing van die regulasies wat brandstofpryse in Suid-Afrika reguleer.

Ackerman is getroud en het vier kinders, almal is in verskeie hoedanighede in die besigheid betrokke.

Toekennings

Hy ontvang in 1986 'n eredoktorsgraad vanaf in die Rhodes-universiteit (Regte) en in 2001 'n eredoktorsgraad in Handel van die Universiteit van Kaapstad.

In 1999 word hy aangewys as een van die 100 mense wat die grootste invloed op Suid-Afrika in die 20ste eeu gehad het, in Media24 se They shaped our century-stemming.

In 2004 word hy in 'n stemming op SAUK3 aangewys as die 79ste grootste Suid-Afrikaner.

Ackerman, saam met sy vrou Wendy, is is 2010 met die David Rockefeller Bridging Leadership in Africa-toekenning vereer.

Verdere leesstof

• Ackerman, Raymond met Pippa de Bruyn en Suzanne Ackerman: A sprat to catch a mackerel - key principles to build your business. Kaapstad: Jonathan Ball Publishers, 2010 ISBN 978-1-86842-369-9