Reddingsdaadbond
Die Reddingsdaadbond, met die leuse: "'n Volk red homself!" was 'n beweging wat ds. J.D. Kestell op 8 Desember 1939 begin het vir die ekonomiese rehabilitasie van verarmde Afrikaners. Die Bond het in 1957 ontbind.
Die stigting het sowat 'n jaar na die reuse-saamtrek van Afrikaners tydens die hoeksteenlegging van die Voortrekkermonument in Pretoria op 16 Desember 1938 gevolg op 'n tydstip toe daar besondere samehorigheid onder Afrikaners geheers het. Leiers van die volk het hulle destyds daaroor bekommer dat sowat 300 000 Afrikaners (byna 'n derde) verarm was.
Baie Afrikaners was weer hulle voete begin het na die verwoesting wat die Anglo-Boereoorlog gesaai het, het tydens die Groot Depressie van die vroeë jare dertig weer alles verloor.
Terselfdertyd is Afrikaners se volksbesef aangewakker deur die simboliese Ossewatrek na Pretoria in 1938. Daarom belê die FAK onder aansporing van Kestell 'n volkskongres in Bloemfontein vir Oktober 1939. Op die kongres besluit afgevaardigdes om 'n volksorganisasie op te rig met 'n Christelik-Nasionale grondslag om die spaarkrag, koopkrag en mensevermoëns van Afrikaners te mobiliseer tot voordeel van die volk en so ontstaan die Reddingsdaadbond.
Die Bond het binne vyf jaar 400 takke en 70 000 lede gehad wat elkeen maandeliks 'n lidmaatskapfooi van ses pennies bygedra het. 'n Derde van die fondse is vir administrasie gebruik, 'n derde vir die afbetaling van 'n lewenspolis of spaarplan vir elke lid en die orige derde as kommissie vir die persoon wat die fondse ingesamel het.
Die bond het gehelp om honderde Afrikaanse ondernemings op die been te bring, wat werksgeleenthede vir Afrikaners in veral die stede geskep het, onder meer Federale Volksbeleggings en die Afrikaanse Handelsinstituut.
Die Reddingsdaadbond ontbind in 1957.
[wysig] Bronne
- Rosenthal, Eric, Encyclopaedia of Southern Africa, Juta and Company Limited, Kaapstad en Johannesburg, 1978.
- Die webwerf Bravoland.co.za, besoek op 14 Mei 2010.
