Regent's Park

in Wikipedia, die vrye ensiklopedie
Spring na: navigasie, soek

Regents Park (8162106961).jpg

Regent's Park

Koninklike Park in
Westminster en Camden


Londen
Vlag van Verenigde Koninkryk Verenigde Koninkryk



Opening

1835


Oppervlakte

166 hektaar


Ligging

Westminster London UK location map.svg Regent's Park in die noorde van Westminster (boonste gedeelte van die kaart)


Bestuur

The Royal Parks


Webtuiste
The Royal Parks

Regent's Park (amptelik The Regent's Park) is een van die Koninklike Parke in die Britse hoofstad Londen. Die park met 'n oppervlakte van 166 hektaar is in die noordweste van die stad geleë en strek oor twee stadsdele, die City of Westminster en die Borough of Camden. Die kampus van 'n bekende tersiêre instelling, Regent's University London, en die Londense Dieretuin (London Zoo) val binne die parkgebied wat dwarsdeur die jaar oop staan vir die publiek.

Uitleg[wysig]

Twee ringpaaie is in Regent's Park aangelê - die Outer Circle loop oor 'n afstand van 4,3 kilometer, terwyl die Inner Circle met 'n lengte van een kilometer die bes versorgde deel van die park, Queen Mary's Garden, omsluit. Behalwe vir twee verdere paaie, wat die twee Circles met mekaar verbind, is die park vir padverkeer gesluit. Die elegante wit pleisterwerk-villa's, wat as terrashuise aan die suidelike, oostelike en westelike kant van die park opgerig is, is deur die befaamde argitek John Nash (1752-1835) ontwerp en het deel uitgemaak van 'n groter bouprojek wat ook altesaam 56 vrystaande villa's ingesluit het. Net agt hiervan is uiteindelik verwesenlik.

Die meer van Regent's Park

Die Regent's Canal, wat die Grand Union Canal met die vroeëre dokke van Londen se seehawe verbind, loop deur die noordelike deel van die park. Regent's Park bestaan hoofsaaklik uit oop parkland met 'n verskeidenheid geriewe, waaronder tuine, 'n meer wat 'n heenkome aan reiers en watervoëls asook geriewe vir bootsport bied, sportvelde en speelterreine. Die park se noordelike gedeelte huisves die Londense Dieretuin en die hoofkwartier van Londen se Dierkundige Vereniging (Zoological Society of London).

Regent's Park behels 'n aantal openbare blomtuine, waaronder Queen Mary's Gardens in die binnekring (Inner Circle) waar die park se opelugteater geleë is; die formele Italiaanse Tuine en die aangrensende informele Engelse Tuine in die suidoostelike hoek van die park; en St. John's Lodge se tuine. Winfield House, die privaat woning van die Amerikaanse ambassadeur in die Verenigde Koninkryk, is op 'n privaat erf in die westelike deel van Regent's Park geleë. Londen se Sentraalmoskee, beter bekend as Regent's Park-moskee, is naby die ambassadeurswoning geleë en kan danksy sy koepel van ver af raakgesien word.

Die kampus van Regent's University London is suid van die binnekring geleë. Dit huisves onder andere die European Business School London, Regent's American College London (RACL) en Webster Graduate School. Primrose Hill, 'n park wat net noord van Regent's Park geleë is, bied 'n uitsig oor Westminster en die City of London.