Regsgeleerdheidgebou UP
Die Regsgeleerdheidgebou op die Hatfieldkampus van die Universiteit van Pretoria met sy skitterwit mure en kenmerkende glasvoorkoms is een van die jongste en mees moderne strukture op kampus. Dit is ontwerp deur die firma Kruger-Roos en is bedoel om die deursigtigheid van die regsberoep te weerspieël. Die gebou is deur voormalige President Thabo Mbeki ingewy in 2005. In 2006 is dit deur die tydskrif Visi en die Suid-Afrikaanse Instituut van Argitekte (SAIA) aangewys as die derdebeste gebou in Gauteng. Die gebou huisves byna al die fasiliteite van die Fakulteit Regsgeleerdheid insluitend personeelkantore, ’n ouditorium, lesingsale en die Oliver Tambo-regsbiblioteek. ’n Wye verskeidenheid uitgelese kunswerke, deur kunstenaars soos Diane Victor, Ike Nkoana, Andrew Verster, Anton Uys, Trevor Coleman, Judy Woodborne en Hermine Spies word in die gebou tentoongestel. Die meeste van die kunswerke is van die Sanlamkunsversameling.[1]
