Reims

in Wikipedia, die vrye ensiklopedie
Spring na: navigasie, soek

Reims
ND Reims Rue Tournelles.JPG

Kaart Wapen
Reims dot.png
Blason Reims 51.svg
Vlag
Rheims Flag.gif
 Land Flag of France.svg Frankryk
 Région (gewes) Flag of Champagne-Ardenne.svg Champagne-Ardenne
 Département Marne
 Koördinate 49°15′N 4°02′O Koördinate: 49°15′N 4°02′O
 Stigting 80 v.C. (Durocorter)
 Oppervlakte:  
 - Totaal 46,9 vk km
 Hoogte bo seevlak 80-135 m
 Bevolking:  
 - Totaal (2004) 184 400
 - Bevolkingsdigtheid 3 990/vk km
 - Metropolitaanse gebied (1999) 291 735
 Tydsone UTC +1
 - Somertyd UTC +2
 Burgemeester Adeline Hazan (PS)
 Amptelike webwerf ville-reims.fr

Reims [ʁɛ̃s] , wat in Frans ook la Cité de Sacres of "Kroningsstad" genoem word aangesien die Franse konings eeue lank in die plaaslike katedraal gekroon is, is 'n stad in die noord-ooste van Frankryk met 'n oppervlak van 46,9 vierkante kilometer en 'n bevolking van 184 400 mense (2004).

Reims lê sowat 130 kilometer noord-oos van Parys in die département Marne, wat deel uitmaak van die administratiewe gewes (région) Champagne-Ardenne. Die stad trek voordeel uit sy strategiese ligging in die noord-ooste van die Paryse Bekken. Reims is die dertiende grootste stad in die land, terwyl sy metropolitaanse gebied tans as die 29ste grootste in Frankryk geranglys word. Ondanks sy groot inwonertal is Reims nog die hoofstad van sy département nog dié van sy administratiewe gewes.

Die katedraal van Reims is die bekendste baken van die stad, en sy Gotiese argitektuur het wêreldfaam vanweë sy volmaakte proporsies en sy rykdom aan kerkvensters en skulpture.

Naas sy historiese rol as Franse kroningsstad, die plek waar die Frankiese koning Clovis I in 498 die Christelike doop ontvang het en as die geboortestad van Colbert en Saint-Jean-Baptiste de la Salle het Reims internasionale bekendheid verwerf as die hoofstad van die Franse sjampanje-nywerheid, en talle bekende wynkelders het hulle hoofkwartiere in die stad. Die wynbedryf het ook die plaaslike kookkuns bevorder sodat Reims met 'n groot aantal eersterangse restourante pronk.

Geografiese ligging[wysig]

Reims lê in die sentrum van Champagne - 'n streek in die uitgestrekte ooste van die Paryse Bekken. Die stadsgebied lê in 'n vlakte aan die regteroewer van die Vesle, 'n takrivier van die Aisne, en aan die kanaal wat die Aisne met die Marnerivier verbind. Die bergreeks Montagne de Reims lê in die suidelike en westelike omgewing van die stad. Ook die plaaslike sjampanje-produsente se wingerde is in die omgewing van Reims geleë.

Geskiedenis[wysig]

Romeinse tydperk[wysig]

Menslike nedersettings het in die gebied van Reims reeds van die vroegste tye af bestaan, en by argeologiese opgrawings in die omgewing van die stad is onder meer begraafplase uit die Bronstydperk met urne ontdek.

Die Romeinse triomfboog Porte de Mars ("Marspoort") dateer uit die 3de eeu

Die plaaslike Keltiese stamme het omtrent 80 v.C. 'n stedelike nedersetting (Latyn: oppidum) met die naam Durocortorum gestig, wat ná die verowering deur die Romeine herdoop is tot Civitas Remorum en as die hoofstad van die Romeinse provinsie Belgica gedien het. Die plaaslike stam, die Remers (Latyn: Remi), het deel uitgemaak van die Keltiese Belgae, maar in teenstelling met hul volksgenote steeds goeie betrekkinge met die Romeinse owerhede onderhou. Die voorregte, wat hul nedersetting in ruil hiervoor geniet het, het van die Civitas Remorum 'n welvarende stad gemaak.

In die laat-Romeinse tydperk het die plaaslike bevolking die Christelike geloof aangeneem, en die stad het as 'n biskopsetel gedien. In 336 het die Romeinse stadhouer Jovinus 'n oorwinning oor Barbaarse invallers in Champagne behaal.

Middeleeue[wysig]

Vanaf die laat antieke tydperk en die vroeë Middeleeue het Reims eeue lank 'n beduidende rol in die Europese geskiedenis gespeel. In die vroeë 5de eeu is die stad deur die dramatiese gebeure rondom die Volksverhuising geraak. Biskop Nicasus, wat omtent 401 'n kerk in Reims opgerig het, is net vyf jaar later tydens die Vandale se aanval op die stad gedood. Hy is later heilig verklaar. In 451 het die Hunne onder die bevel van Attila die stad verower, maar hulle ná die Slag op die Katalauniese Velde naby Reims weer teruggetrek. Die Franke het Reims in 483 ingeneem.

In 498 het die Frankiese koning Clovis I deur biskop Remigius in die katedraal van Reims die Christelike doop ontvang en sodoende die suksesvolle simbiose tussen die Frankiese gesag en die Rooms-Katolieke Kerk bevorder wat 'n beslissende rol by die opbou en uitbreiding van die Frankiese Ryk gespeel het. Reims het vinnig ook die setel van 'n aartsbiskop en ná die Merovingiese verdeling van die ryk die administratiewe hoofstad van een van die nuwe deelryke geword.

Bronne[wysig]

  • Met erkenning aan die Maison de la France, die Comité Régional du Tourisme de Champagne-Ardenne en die Région Champagne-Ardenne wat inligtingsmateriaal beskikbaar gestel het.