Riaan Cruywagen
| Riaan Cruywagen | |
 |
|
|
Riaan Cruywagen lees die nuus
|
|
|
|
|
| Geboorte | 5 Oktober 1945 Suid-Afrika |
|---|---|
| Beroep | Nuusleser stemkunstenaar |
Riaan Cruywagen (* 5 Oktober 1945) is 'n Suid-Afrikaanse televisienuusleser en stemkunstenaar wat sedert 1975 by die SAUK en hul eerste televisie-uitsendings betrokke was.
In Junie 2003, na openbare ontstokenheid oor berigte dat Cruywagen se kontrak by die SAUK nie hernieu sou word nie, is 'n skikking tussen die SAUK en UASA (United Association of South Africa) berei. Sy kontrak is hernieu, en dit is aangekondig dat hy vir 'n tydperk met sy pligte sou voortgaan. Na aanleiding van sy afwesigheid van die nuusspan tydens hierdie besprekings, het die Suid-Afrikaanse musiekgroep Zinkplaat die liedjie "Waar is Riaan" opgeneem.
Cruywagen se naam het tydens sy langdurige loopbaan sinoniem geraak met Afrikaanse televisienuus. In die middel van die dekade 2000, na die kontrakhernieuwingskwessie, was Cruywagen weereens vir 'n tydperk in die fokus van populêre kultuur in Suid Afrika, toe 'n aantal humoristiese e-posse en internetbladsye, wat oorspronklik na Chuck Norris en David Hasselhoff verwys het, gewysig is met sy naam in plek van hulle s'n. Humor met 'n Suid-Afrikaanse tema in 'n soortgelyke trant is ook gesirkuleer, meestal met verwysing na sy voortgesette jeugdige voorkoms en intellektuele vermoëns.
Cruywagen was die stemkunstenaar vir die karakter Haas Das op die gewilde Afrikaanse kindernuusprogram Haas Das se Nuuskas. Daar is sprake van 'n moontlike terugkeer van die program ná 'n lang afwesigheid.[1]
Cruywagen het in rolprente verskyn waar hy gereeld homself as nuusleser vertolk het, insluitende 'n verskyning van hom as Zoeloe-nuusleser in Leon Schuster se Sweet 'n Short.[2]. Hy het ook verskyn in die film Stander as a nostalgiese herinnering aan sy lang loopbaan as nuusleser.
