Rooi reus
’n Rooi reus is ’n helder reusester met ’n lae of gemiddelde massa (rofweg 0,5–10 sonmassas) in ’n laat stadium van sterevolusie. Die buitenste atmosfeer is uitgesprei en yl – daarom is die radius groot en die oppervlaktemperatuur laag, vanaf sowat 5 000 kelvin en laer. Die ster lyk geel-oranje tot rooi en sluit in spektraaltipes K en M, maar ook S- en koolstofsterre.
Daar word geglo hoofreekssterre van spektraaltipe A tot K ontwikkel in rooi reuse.[1] Tydens sy hoofreeksfase verbrand ’n ster langsamerhand waterstof in sy kern en sit dit om in helium; sy hoofreeksfase eindig wanneer byna al die waterstof in die kern opgebruik is en hy betree dan die rooireusfase op die Hertzsprung-Russell-diagram.[2]. Die meeste rooi reuse se buitekant sit steeds waterstof om in helium terwyl die kern uit onaktiewe helium bestaan. Hierdie fase duur net ’n paar miljoen jaar[3] en is dus kort in vergelyking met die miljarde jare van die ster se bestaan.
Die Son se hoofreeksfase is sowat 10 miljard jaar; groter sterre het ’n korter leeftyd en kleiner sterre ’n langer leeftyd.[2]
Prominente helder rooi reuse aan die naghemel sluit in Aldebaran (Alpha Tauri), Arcturus (Alpha Bootis) en Gamma Crucis (Gacrux), terwyl die nog groter Antares (Alpha Scorpii) en Betelgeuse (Alpha Orionis) rooi superreuse is.
Verwysings [wysig]
- ↑ Color of star ranging blue through orange
- ↑ 2,0 2,1 Zeilik, Michael A.; Gregory, Stephan A. (1998). Introductory Astronomy & Astrophysics, 4de, Saunders College Publishing, 321–322. ISBN 0-03-006228-4.
- ↑ Red Giants
Eksterne skakels [wysig]
Wikimedia Commons het meer media verwant aan: Rooi reuse
Hierdie artikel is vertaal uit die Engelse Wikipedia
| Soorte sterre en sterregroepe | |||||||||
|
|||||||||
