Rowy, Pommere
Rowy (Duits Rowe) is 'n Poolse strandoord in die Woiwodskap Pommere.
Die voormalige vissersdorp aan die Oosseekus is tussen duingebiede en rietmoerasse geleë, naby die plek waar die Łupawa-rivier uit die Gardno-meer uitvloei en aan die westelike rand van Nasionale Slowinsiese Park (Słowiński Park Narodowy).
Rowy se kuslandskap met sy helder lig en klaar blou lug het skilders van die Duitse kunstenaarsgroep Die Brücke soos Max Pechstein (1881-1955) en Karl Schmidt-Rottluff (1884-1976) aangetrek wat hier van hul mooiste werke geskep het. Die eksklusiewe kunstenaarskolonie met sy tipiese vissershuise, wat voor die Tweede Wêreldoorlog bestaan het, het nie bewaar gebly nie.
Intussen het Rowy met sy kampeerterreine, gashuise, hotelle en somerhuise 'n gewilde vakansiebestemming geword.
