Sachertorte

in Wikipedia, die vrye ensiklopedie
Sachertorte in die Weense Hotel Sacher word tradisioneel met 'n sjokoladeseël versier en met ongesoete slagroom bedien
Sacher-winkel in Wene
Die Hotel Sacher in Wene
Die koffiehuis en fynbakkery Demel het sy eie weergawe van die befaamde koek geskep

Die Sachertorte word as die wêreld se bekendste koek beskou.[1][2] Die sjokoladekoek het sy oorsprong in die Oostenrykse hoofstad Wene en is vir die eerste keer in 1832 deur die sestienjarige Franz Sacher (1816–1907), 'n tweedejaarse leerjonge aan die hof van Prins Metternich, gebak nadat hy die opdrag gekry het om 'n buitengewone nagereg vir 'n amptelike onthaal te skep.[3] Sy seun Eduard Sacher het die resep later met couverture en appelkooskonfyt verfyn. In 1876 het Eduard Sacher die Restourant en Hotel Sacher gestig.

Net die hoofbestanddele van die geheime resep is bekend. Watter bestanddele gebruik mag word, word deur die Oostenrykse Departement van Gesondheid se Kode van kosbestanddele (Latyns: Codex Alimentarius Austriacus, Duits: Österreichisches Lebensmittelbuch) bepaal.[4] Volgens kenners speel die verskillende sjokoladesoorte, wat vir die koek gebruik word, en hul mengselverhouding 'n beslissende rol.[5]

Volgens die Hotel Sacher word jaarliks meer as 270 000 Sachertorten vervaardig, waarvoor 1,2 miljoen eiers, 80 ton suiker, 70 ton sjokolade, 37 ton appelkooskonfyt, 25 ton botter en 30 ton koekmeel benodig word. Original Sacher-Torte is 'n handelsmerk van die Hotel Sacher, en die koek is net beskikbaar in die Hotel Sacher in Wene, die Hotel Sacher in Salzburg, die Café Sacher in Innsbruck, die Café Sacher in Graz, die Sacher-winkel in Bozen (Bolzano, Suid-Tirool) en op die internasionale lughawe Wene-Schwechat. Daarnaas kan dit ook by die Hotel se aanlynwinkel bestel word.

Die Hotel Sacher het dekades gelede 'n regsaak teen die Weense fynbakkery Demel begin, wat ook 'n Original Sacher-Torte aangebied het, en eers in 1955 kon dié saak deur die Weense handelsgeregshof besleg word. Sedert 1965 word hierdie koek onder die naam Demel's Sachertorte bemark. Demel se koek verskil ten opsigte van die appelkonfyt-laag, wat hier in die middel van die koek lê en nie regstreeks onder die sjokolade-glasering nie.

Aangesien Sachertorte 'n relatief droë koek is, word dit in Oostenryk meestal met (ongesoete) slagroom bedien. Oorspronklik het fynproewers dit met 'n glasie cognac geniet.[6]

Verwysings[wysig | wysig bron]

  1. www.sacher.com: Original Sacher-Torte. Besoek op 19 Februarie 2017
  2. www.meinbezirk.at: Die wohl berühmteste Torte der Welt. Besoek op 19 Februarie 2017[dooie skakel]
  3. "www.wien.info - Amptelike webtuiste van Wene se Toerismekantoor: Sachertorte à la Sacher. Besoek op 19 Februarie 2017". Geargiveer vanaf die oorspronklike op 29 Januarie 2017. Besoek op 19 Februarie 2017.
  4. Bundesministerium für Gesundheit: Österreichisches Lebensmittelbuch. 4de uitgawe. Codexkapitel / B 34 / Konditorware, bl. 3: Sacher, Sachermasse
  5. www.meinbezirk.at: Die wohl berühmteste Torte der Welt. Besoek op 19 Februarie 2017[dooie skakel]
  6. Wien Geschichte Wiki (verskaf deur die Weense stadsregering): Sachertorte. Besoek op 19 Februarie 2017[dooie skakel]