Salpeterkop

Salpeterkop naby Sutherland is 'n rustende vulkaan wat 66 miljoen jaar gelede aktief was. Dit is die jongste bekende aktiewe vulkaan in Afrika suid van die Sahara.

Hierdie kop lê 15km suidoos van die dorp op die plaas Blaauwbloemetjes Keep, steek 300m bo die omringende vlakte uit en bereik 'n hoogte van 1 766m bo seevlak. Minstens 2km van die bopunt van die piek het deur erosie verdwyn. Die kop bestaan uit die brokstukke van ander gesteentes (bekend as breccia) en uit poreuse vulkaniese gesteente (bekend as tufsteen of asklip). Verskeie minerale insluitende salpeter is in die breccia en tufsteen geïmpregneer. Op en rondom die kop is intensief geëksploreer. Alhoewel 77 verskillende minerale teengekom is, kan slegs bariet (swaarspaat) lonend gedelf word. In verskeie grotte in die kop is duidelike tekens van San- en na bewering Nguni-bewoning. Die naam Salpeterkop is waarskynlik in 1778 deur kol. Robert Jacob Gordon gegee.

Let wel: Daar is ook 'n Salpeterkop in die Bergkwaggapark by Cradock.

Bibliografie

• Coetzee, C.B. (red.): Delfstowwe van die Republiek van Suid-Afrika. Pretoria: Departement van Mynwese, 1976. ISBN 0-621-06436-X
• Standard Encyclopaedia of Southern Africa, deel 9. Kaapstad: Nasou, 1973. ISBN 0-625-00325-X
• Strauss, Pieter: San-oupas was in dié vulkaan. Buite, Die Burger, 5 Augustus 2014.
• Yell, Nicholas: Circling the Great Karoo. A back-roads journey through history on an old scrambler. Botrivier: WritingInc, 2008. ISBN 978-0-620-420-23-5
• www.geocaching.com