Sewendedagadventisme

Ellen G.White, een van die stigters van die beweging.

Die heel eerste kerkgebou van die Sewendedagadventistekerk in Afrika en Australië, opgerig omstreeks 1890 in Beaconsfield, is vandag 'n nasionale gedenkwaardigheid.

Die Sewendedag-Adventiste is 'n Christelike kerkverband waarvan die lidmate glo dat Jesus in die nabye toekoms na die aarde sal terugkeer. Anders as die meeste ander Christelike groepe, onderhou hulle Saterdag (en nie Sondag nie) as hul godsdienstige rusdag. Die Sewendedag-Adventiste kerk in Suider-Afrika het in 1887 ontstaan en die eerste sendingstasie, in Rhodesië, het in 1893 tot stand gekom.

Ontstaan in Suid-Afrika

Pieter Wessels, eienaar van die plaas Benoudheidsfontein, het in 1885 uit die Gereformeerde Kerk bedank om Saterdag as die sabbatdag waar te neem. Eindelik het agt gesinne sy voorbeeld gevolg, onder wie ook N.J. de Beer, oudste seun van Johannes Nicolaas de Beer, aan wie De Beers Consolidated Mines sy naam te danke het. 'n Mynwerker, William Hunt, uit die Amerikaanse deelstaat Nevada, het nadat hy op die diamantveld aangekom het uit Australië, die afgesonderde geloofsgemeenskappie aan Sewendedagadventisme bekendgestel en later het Amerikaanse predikante na die diamantveld gekom om hulle te bedien. In die tyd toe die sinkkerk op Beaconsfield by Kimberley gebou is (die moederkerk van dié kerkverband in Afrika), het Wessels sy plaas vir £350 000 aan die De Beers-maatskappy verkoop en daarna is dit Wesselton-myn genoem. Sewendedagadventisme het wêreldwyd hierby baat gevind danksy skenkings van Wessels en so kon die beweging in 13 afdelings in talle wêrelddele georganiseer word.

Wessels en sy broer het sendingwerk onder swart mense gereël, die oprigting van die kerkgebou in Roelandstraat, Kaapstad, gefinansier asook die Kellogg-sanatorium in die VSA en 'n tehuis vir gevalle meisies in Chicago. Hunt het later teruggekeer na Australië, waar hy die baanbreker van die Sewendedagadventisme was. In Rhodesië het Cecil John Rhodes grond aan dié kerkverband geskenk.

Bron

• (en) Potgieter, D.J. 1971. Standard Encyclopaedia of Southern Africa. Cape Town: Nasionale Opvoedkundige Uitgewery Ltd.

Eksterne skakels

• Wikimedia Commons het meer media in die kategorie Sewendedagadventisme.