Skilpadjies

in Wikipedia, die vrye ensiklopedie
Spring na: navigasie, soek

Skilpadjies is 'n eg Suid-Afrikaanse dis, ook bekend as "muise", "vlermuise" en "pofadder".

Die gereg bestaan uit lamslewer wat in netvet (die vetterige vlies wat die niere bedek) toegerol is. Meeste kokke maal die lewer grof en voeg dan koljander, 'n gekapte ui, sout en Worcestershire-sous daarby. Daarna word die mengsel in balletjies van ongeveer 80 mm omtrek gerol, toegedraai in netvet en stewig vasgesteek met 'n tandestokkie. Die gaarmaak behels braai oor 'n oop koolvuur totdat die vet begin bros raak.

Die name "skilpadjie", "muise", "vlermuise" en "pofadder" verwys na die gereg se uiterlike voorkoms. "Pofadder" is die grootste variëteit, omtrent die grootte van 'n man se voorarm. Dit word ook gemaak van gemaalde lewer wat in 'n groot stuk netvet toegedraai is en gewoonlik by partytjies bedien word aangesien een gebraaide "pofadder" 8 tot 10 porsies kan oplewer.

Dit is uiteraard 'n baie ryk maal met hoë cholesterol en versadigde vet; en die verbruiker moet normaalweg heelwat stysel in die vorm van mieliepap of roosterbrood saam met die skilpadjies nuttig, om nie 'n aanval van oordadigheid te beleef nie.

Sien ook[wysig]