Slangdraer (sterrebeeld)
| Slangdraer | ||||
 |
||||
| Latynse naam | Ophiuchus | |||
| Genitief | Ophiuchi | |||
| Afkorting | Oph | |||
| Waarnemingsdata (Epog J2000) | ||||
| Regte klimming | 17h | |||
| Deklinasie | -8º | |||
| Grootte | 948 vk. grade (11de) | |||
| Kwadrant | SQ3 | |||
| Besonderhede | ||||
| Hoofsterre | 10 | |||
| Helderste ster | Alpha Ophiuchi | |||
| Naaste ster | Barnard se Ster | |||
| Sterre helderder as 3 m | 5 | |||
| Sterre met planete | 12 | |||
| Messier-voorwerpe | 7 | |||
| Bayer-/Flamsteed-sterre | 62 | |||
| Meteoorreëns | Ophiuchiede | |||
| Aangrensende sterrebeelde | ||||
| Hercules, Slang, Weegskaal, Skerpioen, Boogskutter, Arend | ||||
|
||||
Die Slangdraer (Latyn: Ophiuchus) is ’n groot sterrebeeld wat om die hemelewenaar geleë is. Die naam kom van die Grieks Ὀφιοῦχος (slangdraer) en dit word gewoonlik uitgebeeld deur ’n man met die sterrebeeld Slang in sy hand. Dit is een van die 48 konstellasies wat deur die 2de-eeuse sterrekundige Ptolemeus beskryf is en is steeds een van die 88 moderne sterrebeelde.
Inhoud |
Ligging [wysig]
Die Slangdraer is tussen Hercules, die Slang en die Arend geleë, noordwes van die Melkweg. In die Noordelike Halfrond kan dit in die somer die duidelikste gesien word.
Die sterrebeeld lê oor die ewenaar, maar hoofsaaklik suid. Dit strek suidwaarts tot by -30°, sodat dit nooit in sy geheel gesien kan word nie.
Ruimtevoorwerpe [wysig]
Die helderste sterre in die Slangdraer sluit in Alpha Ophiuchi, ook Rasalhague genoem, naby sy kop en Eta Ophiuchi.
RS Ophiuchi is deel van ’n klas wat herhalende novae genoem word. Dit word met ongereelde tussenposes honderde kere helderder binne slegs ’n paar dae. Daar word geglo dit is op die punt om ’n tipe 1a-supernova te word.[1] Ook Barnard se Ster, een van die naaste sterre aan ons sonnestelsel, lê in die Waterdraer.
In Oktober 1604 is ’n supernova naby θ Ophiuchi ontdek. Johannes Kepler het dit so deeglik bestudeer dat dit later Kepler se Supernova genoem is. Hy het sy bevindings gepubliseer in ’n boek met die titel De stella nova in pede Serpentarii (Oor die Nuwe Ster in die Slangdraer se Voet).
In sowat 40 000 jaar sal Voyager 1 binne 1,6 ligjare kom van die ster AC+79 3888, wat in dié sterrebeeld lê.[2]
In 2009 is aangekondig die ster GJ 1214 ondergaan herhaalde en reëlmatige verdowwing (met tussenposes van sowat 1,5 dae), wat ooreenstem met die beweging van ’n klein planeet wat daarom wentel.[3] Die planeet se laer digtheid (sowat 40% van die Aarde s'n) beteken dit kan ’n aansienlike hoeveelheid lae-digtheid-gas hê – moontlik waterstof of stoom.[4] Die nabyheid van die ster aan die Aarde (42 ligjare) beteken dat groot belangstelling daarin heers om dit verder te ondersoek.
Die Slangdraer bevat ook verskeie sterreswerms sowel as die newelvlek IC 4603-4604.
Die Slangdraer en die diereriem [wysig]
Die Slangdraer is een van die 13 sterrebeelde wat die sonnebaan kruis.[5] Dit is daarom al die "13de teken van die diereriem" genoem. Dan word die woorde sterreteken en sterrebeeld egter verwar. Die sterretekens is ’n eweredige verdeling van die son se baan (hulle strek elk sowat 30° ver, min of meer die afstand wat die son in ’n maand aflê). Die sterrebeelde verskil egter in grootte en het te doen met die posisie van die sterre. Die diereriem word net losweg met hulle verbind en stem in die algemeen nie met hulle ooreen nie. In Westerse astrologie stem die sterrebeeld Waterdraer byvoorbeeld grootliks ooreen met die sterreteken Visse, terwyl die sterrebeeld die Slangdraer die grootste deel van die sterreteken Boogskutter beslaan.
Verwysings [wysig]
- ↑ Star 'soon to become supernova'. BBC News, 2006-07-23
- ↑ Voyager - Mission - Interstellar Mission
- ↑ Charbonneau et al. "A super-Earth transiting a nearby low-mass star" Nature 462, 891-894 (17 December 2009)
- ↑ Rogers & Seager. "Three Possible Origins for the Gas Layer on GJ 1214b" Astrophysical Journal 716, 1208-1216 (Junie 2010)
- ↑ Lee T. Shapiro, "Constellations in the zodiac", in The Space Place (Nasa, laas bygewerk op 22 Julie 2011).
Eksterne skakels [wysig]
Wikimedia Commons het meer media verwant aan: Die Slangdraer
Hierdie artikel is vertaal uit die Engelse Wikipedia
| Die 88 moderne sterrebeelde |
|
Agterdek • Akkedis • Altaar • Andromeda • Arend • Beeldhouer • Beker • Berenice se Hare • Boogskutter • Bul • Cassiopeia • Cepheus • Dolfyn • Draak • Driehoek • Duif • Eenhoring • Eridanus • Feniks • Graveerstif • Groot Beer • Groot Hond • Haas • Hercules • Horlosie • Indiër • Jaghonde • Jagter • Kameelperd • Kameleon • Kiel • Klein Beer • Klein Hond • Klein Leeu • Koetsier • Kompas • Kraai • Kraanvoël • Kreef • Net • Leeu • Lier • Lugpomp • Maagd • Mikroskoop • Noordelike Kroon • Noordelike Waterslang • Oktant • Oond • Paradysvoël • Passer • Perseus • Pou • Pyl • Ram • Rooikat • Seile • Sekstant • Sentour • Skerpioen • Skild • Skilder • Slang • Slangdraer • Steenbok • Suidelike Driehoek • Suidelike Kroon • Suidelike Vis • Suidelike Waterslang • Suiderkruis • Swaan • Swaardvis • Tafel • Teleskoop • Toekan • Tweeling • Veewagter • Visse • Vlieënde Perd • Vlieënde Vis • Vlieg • Vos • Vul • Walvis • Waterdraer • Weegskaal • Winkelhaak • Wolf |
