Slaptjips
vanuit Wikipedia, die vrye ensiklopedie.
Slaptjips is diepgebraaide stafies aartappels wat ongeveer so lank soos 'n vinger is. Hulle was oorspronklik 'n Belgiese spesialiteit, maar het intussen dwarsoor die wêreld 'n gewilde vullende bygereg geword wat dikwels ook by wegneemete-plekke verkoop word. Slaptjips is daarnaas een van die belangrikste bevrore voedselprodukte.
[wysig] Metode
Vir die bereiding van slaptjips word geskilde aartappels in stafies met 'n deursnee van sowat een sentimeter en 'n lengte van tussen twee en tien sentimeter gesny, effens gedroog en vervolgens in plantolie twee keer diepgebraai - eers teen 'n temperatuur van tussen 140 en 180 °C totdat hulle 'n liggeel kleur kry, en daarna - sodra hulle afgekoel het - 'n tweede keer teen 'n temperatuur van sowat 190 °C diepgebraai totdat hulle 'n goue kleur gekry het.
Slaptjips wat op een keer diepgebraai word, is dikwels aan die binnekant nie gaar gebraai nie of kry 'n donker kors. Indien 'n te groot hoeveelheid slaptjips op een keer gebraai word, koel die olie sterk af, en die aartappels suig baie olie op aangesien daar geen beskermende korslaag kan vorm nie. Voordat hulle bedien word, word die slaptjips gedreineer en gesout.
Restourante en privaat verbruikers gee dikwels die voorkeur aan industrieel verwerkte slaptjips wat na die eerste braai bevries word. Hulle moet net nog een keer diepgebraai of in die oond gebak word. Verwerkte slaptjips word soms ook van aartappelpuree of -granulaat gevorm.
Vir die industriële vervaardiging van slaptjips word veral langerige aartappels gebruik. Produsente gee die voorkeur aan soorte met 'n liggeel kleur sodat die klaar produk goudbruin en nie grys is nie. Aartappelsoorte met 'n hoër konsentrasie stysel krimp nie wanneer die water verdamp nie. Geskikte soorte is byvoorbeeld Agria, Granola en Ditta.[1]
Die aartappel word gewas en onder stoom in 'n aartappelskiller geskil, geblansjeer, in loopbanddroërs gedroog en in groot diepbraaiers gebak. Sodra die slaptjips klaar is, word hulle afgekoel en uiteindelik in vriestonnels bevries. Moderne aanlegtes vir die vervaardiging van slaptjips kan tot by 25 ton klaar produkte per uur hanteer.
Die grootste vervaardigers wêreldwyd is McCain Foods (Kanada), Simplot en Lamb Weston (albei in die VSA).
