Springbokvlakte
Die Springbokvlakte lê in die Limpopoprovinsie met as suidgrens die Pienaarsrivier waar dit die N1-hoofpad van Pretoria na Pietersburg (Polokwane) kruis. Weswaarts sluit dit in die dorpe Warmbad (Bela-Bela), Nylstroom (Modimolle), Naboomspruit (Mookgophong) en Potgietersrus (Mokopane). Na die ooste is die dorpies Roedtan, Crecy, Marolong, Nutfield, Tuinplaas en Settlers deel daarvan. Dit is ‘n 80km breë en 130km lang strook grond wat in ‘n noordoostelike rigting loop met Roedtan as die sentrale dorp.
Na die Tweede Vryheidsoorlog is die gebied oopgestel vir boerdery. Graslande het plek gemaak vir landerye of het bedek geraak met doringbome. Daar word geboer met koring, mielies, katoen, sorghum, grondbone en sonneblomme en onder besproeiing is lemoenbome aangeplant. Verskeie wildsplase bring nou weer die verskeidenheid wildsbokke wat die streek tot aan die einde van die 19de eeu gekenmerk het, terug.
Die vlakte is besonder plat, ‘n 1000m bo seespieël, ervaar warm somers (beskerm deur die Hoëveld teen koue winde ) en droë winters. ‘n Gemiddelde jaarlikse reënval van 622mm is normaal. Die swart turfgrond is besonder vrugbaar.
In die bodem is steenkool- en uraanreserwes.
[wysig] Bibliografie
- Standard Encyclopaedia of Southern Africa, deel 10. Kaapstad: Nasou, 1974. ISBN 0-625-00326-8
- www.miningweekly.com 21 Maart 2008, 6 April 2010
