Squaw Valley

in Wikipedia, die vrye ensiklopedie
Spring na: navigasie, soek
Die dorp in Squaw Valley

Squaw Valley is 'n ski-oord in die Olympic Valley (deelstaat Kalifornië, Verenigde State) en die plek waar die Olimpiese Winterspele 1960 gehou is.

Die skigebied van Squaw Valley is een van die mees gesofistikeerdes in die VSA en die tweede grootste in die Lake Tahoe-gebied na die Heavenly-ski-oord. Squaw Valley beskik oor hoogs moderne hoëspoed-ski-lifte asook die enigste Funitel in die land.

Vanweë Squaw Valley se gewildheid - die ski-oord lok jaarliks sowat 60 000 skitoeriste - word die naam van die skigebied intussen ook gebruik om na die hele Olympic Valley-gebied te verwys. Die ski-oord is in die Sierra Nevada-bergreeks geleë en strek oor ses pieke en 'n totale oppervlakte van 4 000 akkers of sestien vierkante kilometer. Die laagste punt lê 1 890 meter (6 200 voet) bo seevlak, terwyl die bergspits Granite Chief, die hoogste punt in die gebied, 2 760 meter (9 050 voet) rys.

Danksy die maritieme invloede word in Squaw Valley jaarlikse sneeuvalle van twaalf meter (veertig voet) of meer aangeteken. Die steil hellings en groot sneeudiepte maak van Squaw Valley 'n uiters geskikte bestemming vir bergskisport.

Geskiedenis[wysig]

Squaw Valley word sedert sy opening in 1949 by die voorste Amerikaanse bergskigebiede gereken. Die ski-oord staan dwarsdeur die jaar oop vir besoekers en bied winter- en somersportaktiwiteite soos ysskaats, perdery en tennis aan. Squaw Valley beskik oor swemgeriewe, 'n spa en 'n tennisbaan.

'n Panoramiese uitsig oor die berggebied, met Lake Tahoe in die agtergrond

In 1942 het Wayne Poulsen, 'n voormalige skisportster van die Universiteit van Nevada in Reno 2 000 akkers (agt vierkante kilometer) se land in die huidige Olympic Valley van Southern Pacific Railroad gekoop. In 1946 het Poulsen vir Alexander Cushing, 'n advokaat met Harvard-opleiding, ontmoet wat oor die nodige politieke en sake-kontakte beskik het wat van die ski-oord 'n sukses sou maak.

Die Olimpiese ringe in Squaw Valley

Kort voor die opening in 1949 het hulle 'n meningverskil oor die toekoms van die ski-oord gehad. Cushing het uiteindelik die Squaw Valley Ski Corp beheer wat daarin geslaag het om die Olimpiese Winterspele van die jaar 1960 na Squaw Valley te bring en Lake Tahoe danksy sy visie vir die berggebied en vernuwings in die skibedryf tot 'n gewilde sportgebied omgeskep het. Tot met sy afsterwe was Cushing die stigter en voorsitter van Ski Corporation, die moedermaatskappy van die Squaw Valley-ski-oord. Cushing het Squaw Valley volgens die voorbeeld van Europese ski-oorde ontwikkel en swembaddens en akkomomodasie vir toeriste eerder op die bergspits as by die voet van die berg laat bou asook die nuutste skilift-tegnologie na die VSA gebring.

Alhoewel die Olimpiese Winterspele 1960 feitlik reeds aan die Oostenrykse stad Innsbruck toegeken was, het Cushing met 'n skaalmodel van sy voorgestelde Olimpiese terrein na Parys gekom. Die ski-oord het destyds eers oor een skilift beskik, maar Cushing het die Internasionale Olimpiese Komitee nogtans oorreed om die Winterspele in Squaw Valley te hou. Die Winterspele in Squaw Valley was die eerste wat regstreeks deur televisie gedek en sodoende deur miljoene toeskouers gevolg is. Hulle het daarnaas die kollig op die Amerikaanse skibedryf laat val en verduidelik dat dit al 'n gehaltevlak kon lewer wat gelykgestaan het aan dié van Europese ski-oorde.

Naas sy sportgeriewe het Squaw Valley ook met sy internasionale skrywerskonferensie, wat jaarliks in Augustus gehou word, bekendheid verwerf. In die 1960's en 1970's het die Worldwide Church of God sy jaarlikse Tabernakelfees ("Feast of Tabernacles") in Squaw Valley se Blyth Arena gevier. Evangeliste soos Herbert W. Armstrong en Garner Ted Armstrong het tydens hierdie feeste verskeie kere toesprake gehou. Blyth Arena is intussen afgebreek. 'n Groot aantal somerkampe in die gebied word vanuit die Valley gereël.