Statkraft

in Wikipedia, die vrye ensiklopedie
Spring na: navigasie, soek
Statkraft AS
Tipe Staatsmaatskappy
Gestig 1986
Hoofkantoor Oslo, Noorweë
Sleutelpersone Christian Rynning-Tønnesen (hoof uitvoerende beampte)
Svein Aaser (voorsitter van die Raad)
Gebied bedien Noorweë
Industrie Elektrisiteit
Inkomste NOK37,82 miljard (2008)
Bedryfsinkomste NOK29,34 miljard (2008)
Netto inkomste NOK16,61 miljard (2008)
Werknemers 1 965
Moedermaatskappy Noorse Ministerie van Ru-olie en Energie
Dogtermaatskappye Trondheim Energi
Webwerf statkraft.com

Statkraft is 'n staatsbeheerde Noorse elektrisiteitsverskaffer. Met 'n totale kragopwekking van 42 TWh is die Statkraft Groep die derde grootste elektrisiteitsverskaffer in die Nordiese lande en die tweede grootste verskaffer van krag uit hernubare energiebronne in Europa. Hernubare energiebronne voorsien in sowat 40 persent van Noorweë se elektrisiteitsbehoeftes. Saam met sy dogtermaatskappye Skagerak Energi en Trondheim Energi het Statkraft Groep sowat 2 100 werknemers in diens. Die maatskappy se hoofkwartier is in die Noorse hoofstad Oslo.

Waterkrag is Statkraft se beduidendste produksiebedrywigheid. Die groep beskik oor 133 waterkragsentrales in Noorweë, twaalf in Swede en vier in Finland, asook twee windkragsentrales in Noorweë - Smøla en Hitra. Ander belangrike aktiwiteite sluit warmtedistribusie in Trondheim en 'n biogasaanleg in Duitsland in.

Statkraft besit 100 persent van Trondheim Energi. Die groep beheer daarnaas 66,62 persent van Skagerak Energi, 50 persent van Naturkraft, 49,9 persent van Bergenshalvøens Kommunale Kraftselskap, 45,5 persent van Agder Energi en 44,6 persent van E.ON Sverige, SN Power Invest en Småkraft.

Geskiedenis[wysig]

Die Noorse staat het sy eerste kragsentrale (Paulafossen) in 1895 gekoop. In 1921 is Norges vassdrags- og energiverk gestig wat onder meer die bedrywighede van staatsbeheerde kragsentrales beheer het. Die kragsentrales en die sentrale transmissiestelsel is in 1986 opgesplits in die maatskappy Statkraftverkene, wat op sy beurt in 1992 in Statkraft en Statnett opgedeel is. Statkraft SF is as 'n staatsbeheerde maatskappy gestig.

In die 1990's en die vroeë 21ste eeu het Statkraft 'n aantal plaaslike kragsentrales in Noorweë gekoop en sy bedrywighede na die buiteland uitgebrei. Statkraft is in 2004 herorganiseer as 'n beperkte maatskappy, alhoewel dit nog steeds volledig deur die Noorse staat beheer is.