Stirling Moss

in Wikipedia, die vrye ensiklopedie
Spring na: navigasie, soek
Moss in 'n Lotus by die Nürburgring 1961

Sir Stirling Moss OBE (gebore 17 September, 1929 in Londen) was 'n Britse renjaer. Hy was die seun van Alfred Moss wat die veertiende plek behaal het in die Indianapolis 500 wedren van 1924.

Stirling Moss was 'n pionier in die Britse Formule Een wedrenbedryf en word as een van die beste renjaers beskou om nog ooit die Wêreldkampioenskap vir Renjaers te gewen het. Hy het vier keer die tweede plek behaal tussen 1955 en 1958.

Moss het 194 van sy totale 497 wedrenne tussen 1948 en 1962 gewen, wat 16 Formule Een Grand Prix-oorwinnings insluit. Vir Moss was die manier waarop die stryd gevoer is net so belangrik as die uitslag en sy goeie sportmansgees het hom moontlik die Wêreldkampioenskap gekos toe hy sy teenstander Mike Hawthorn verdedig het toe daar in Portugal oorweeg is om hom weens 'n oortreding te straf. Hawthorn het Moss toe uiteindelik met 'n enkele punt gewen ten spyte van die feit dat hy slegs een wedren gewen het teenoor Moss se vier oorwinnings.

In 1962 is Moss ernstig beseer tydens 'n ongeluk te Goodwood in sy Lotus. Hy het herstel en 'n te vroeë terugkeer tot motorwedrenne probeer maak. Hy het egter agtergekom dat hy nie meer die mas kon opkom nie en sy aftrede van Grand Prix wedrenne aangekondig. Hy het egter voortgegaan om in veteraanmotorwedrenne deel te neem.

Een van sy beroemdste wedrenne was tydens die Mille Miglia van 1955, 'n 1500 km oop pad uithouren in Italië, wat hy in 'n rekordtyd van 10 uur en 8 minute gewen het (Juan Manuel Fangio het tweede geëindig). Sy medebestuurder in die Mercedes-Benz 300 SLR was joernalis Denis Jenkinson wat hom ondersteun het met notas oor die besonderhede van die lang pad ('n innovasie wat direk gelei het tot die instel van die navigator in tydrenne).

Moss se eerste Formule Een oorwinning was in 1955 by die Britse Grand Prix te Aintree. Dit was die enigste wedren waarin hy sy spanmaat, vriend, mentor en teenstander by Mercedes, Juan Manuel Fangio uitgestof het. Daar word egter dikwels gegis oor die moontlikheid dat Fangio Moss op die laaste draai laat verbygaan het sodat hy voor sy tuisskare kon wen.

Tydens sy loopbaan het Moss in verskeie motors gejaag, onder andere in 'n private Jaguar, vir Maserati, Vanwall, Lotus vir Cooper en dan ook vir die magtige Mercedes-Benz.

Sien ook[wysig]

Eksterne skakels[wysig]