Taipei

in Wikipedia, die vrye ensiklopedie
Spring na: navigasie, soek

Taipei
臺北市
Taipei 101 from afar.jpg

Kaart Seël
Taiwan ROC political division map Taipei City.svg
Taipei City seal.svg
Vlag
Flag of Taipei City.svg
 Land Flag of the Republic of China.svg Republiek van Sjina
 Administratiewe gewes Noord-Taiwan
 Koördinate 25°2' N 121°32' O
 Stigting 1709
 Oppervlakte:  
 - Totaal 271,8 vk km
 Hoogte bo seevlak 10 m
 Bevolking:  
 - Totaal (Maart 2009) 2 619 920
 - Bevolkingsdigtheid 9 639,2/vk km
 - Metropolitaanse gebied 10 072 918
 Tydsone UTC +8 (CST)
 Burgemeester Hau Lung-bin (KMT)
 Amptelike Webwerf Taipei

Taipei (Sjinees: 臺北市) is die hoofstad en tweede grootste stad van die Republiek van Sjina met 2 619 920 inwoners (skatting Maart 2009). Die stad op die eiland Taiwan, wat teen die Danshueirivier lê, is die ekonomiese en kulturele sentrum van die eilandrepubliek. Die vernaamste nywerhede is elektriese en elektroniese uitrusting, tekstiele, metale, skeepsbou en motorfietse.

Geskiedenis[wysig]

Taipei was oorspronklik die tuiste van die Ketagalan. Eers met die begin van die Ming-dinastie (1368-1644) het die immigrasie van Sjinese 'n aanvang geneem. In die 17de eeu het die gebied onder Spaanse en Nederlandse heerskappy gekom, tog is die Europeërs deur die Sjinese veroweraar Koxinga (Zheng Chenggong) weer verdryf. Die gebied van Taipei het tydens die grootskaalse Sjinese kolonisasie 'n ongerepte wildernis gebly, aangesien die setlaars van die vasteland hulle veral in die stad Tainan gevestig het.

In 1949, toe die regering van die Republiek van Sjina haar setel na Taiwan verskuif het, was Taipei nog 'n onbenullige klein stad. Vanaf die sestigerjare het dit egter tot een van die belangrikste metropole in Asië ontwikkel. Desondanks die ekonomiese groei is die Sjinese karakter van die stad bewaar en lok vandag selfs toeriste uit Hong Kong en Singapoer, waar die ou Sjinese stadskerne grotendeels verdwyn het.

Geografie en klimaat[wysig]

Taipei lê teen die Tamsoeirivier, in 'n kusvlakte van die subtropiese Noord-Taiwan. Die eiland het net twee seisoene, 'n hete tussen Mei en Oktober en 'n koue van Desember tot Maart. Die taifoenseisoen duur van Julie tot Oktober.

Besienswaardighede[wysig]

  • Taipei 101 is 'n finansiële sentrum en tans die tweede hoogste gebou wêreldwyd teen 508 m (net ná Burj Dubai in Doebaai, wat 512,1 m hoog is). Sy argitektoniese styl simboliseer die bamboesplant, terwyl die syfer "101" na die aantal verdiepings verwys. Die gebou is volgens die ou Sjinese leerstellings van feng shui ontwerp. Dit neem die 63 hoëspoed-hysbakke slegs sowat 30 sekondes om die uitkykplekke bo-op te bereik. Die hysbakke is lugdig verseël om te voorkom dat die passasiers se trommelvliese ernstig beseer word.
  • Die Grand Hotel in die styl van 'n ou Sjinese paleis is 'n bekende baken in die noorde van Taipei.
  • Oos van die Grand Hotel lê die National Revolutionary Martyr's Shrine, ter nagedagtenis van die gesneuwelde nasionale rewolusionêre van Sjina.
  • Die Nasionale Paleismuseum huisves sedert 1965 die crème de la crème van die Sjinese kuns, en slegs 'n klein gedeelte van die honderdduisende kunswerke, wat die museum bewaar, word vertoon. Die skilderye, jade, porselein, kalligrafieë en ander objekte uit 1 000 jaar se geskiedenis is die oorspronklike versameling van die Sjinese keisers wat voor die Japanners en kommuniste gered is.
  • By die uitgestrekte Kulturele Sentrum Tsiang Kai-Sjek bekoor 'n oorwelfde poort in die Ming-styl, met 'n indrukwekkende hoogte van 30 m.
  • Die Hwa-Hsi-Straat bied snags die outentieke atmosfeer van 'n Sjinese mark. Weens die talle slangehandelaars word die straat ook "Slangelaan" genoem. In die buurt lê ook die
  • Drakensberg (Loeng-sjan)-tempel met 'n groot aantal skulpture en ander kunswerke. Sy naam is te danke aan die draakskulpture bo-op sy dak.
  • Die China Ceramics Factory (Sjinese Keramiekfabriek) in die voorstad Peitou wys hoe die kosbare plaaslike porselein vervaardig word.
  • Die Hsing-Tien-tempel in die Min-Huan Oos-Straat 261 is 'n tipiese voorbeeld van Sjinese tempelargitektuur. Twee miniatuurtuine simboliseer die natuur.
  • Die Bao-An-tempel in die Ha-Mi-Straat is 'n tipiese Sjinese tempel wat met sy besigheid en bontheid 'n indruk van die tradisionele Sjinese godsdiensuitoefening gee.