Tale van Denemarke

in Wikipedia, die vrye ensiklopedie
Spring na: navigasie, soek

Die Koninkryk van Denemarke het slegs een amptelike taal, Deens, die amptelike nasionale taal van die Deense volk, maar daar is ook ’n paar minderheidstale wat in hierdie gebied gepraat word. Hulle is Duits, Faroëes en Groenlands.

Die oorgrote meerderheid Dene praat Engels as tweede taal (86%);[1] dit is 'n verpligte vak wat Deense studente moet neem vanaf Graad 4 in die Folkeskole. In Graad 7 kan 'n derde taal geneem word, gewoonlik Duits of Frans. Die meerderheid kies Duits.[1]

Amptelike minderheidstale[wysig]

Duits[wysig]

Duitse taalkennis in Denemarke, 2005. Volgens die Eurobarometer[1] het 58% van die respondente aangedui dat hul Duits goed genoeg is om 'n gesprek mee te voer. Hieruit het 15% gesê dat hul oor 'n baie goeie kennis van die taal beskik, terwyl 33% 'n goeie kennis en 52% basiese Duits onder die knie het.

Duits is ’n amptelike minderheidstaal in die Graafskap Suid-Jutland (Suid-Denemarke) wat voor die Vredesverdrag van Versailles aan Duitsland behoort het. Tussen 15 000 en 20 000 etniese Duitsers bly in Suid-Jutland waarvan sowat 8 000 óf die Standaardduits óf die Sleeswykse variant van Platduits of Nedersaksies in hul daaglikse omgang besig.

Sleeswyks verskil baie van Standaardduits en kan nogal moeilik verstaanbaar wees vir ’n Duitser wat Hoogduits besig. Buitekant Suid-Jutland gebruik lede van die St. Pieterskerk in Kopenhagen Duits as hul godsdienstaal, op hul webwerf en die skool wat die kerk bedryf. [1]

Faroëes[wysig]

Posseëls in Faroëes.

Faroëes is ’n Noord-Germaanse taal, soos Deens, wat as die hooftaal op die Faroëreilande, ’n selfregerende gebied binne die koninkryk, gepraat word. Dit word ook deur die Faroërs gepraat wat bly in Denemarke. Faroëes lyk baie op Yslands en ook na die Oudnoorse taal wat in die Skandinawiese gebied meer as ’n millennium tevore gepraat is.

Groenlands[wysig]

Groenlands is die hooftaal van die 54 000 Inuit wat woonagtig is in Groenland wat, net soos die Faroëreilande, ’n selfregerende gebied binne Denemarke is. Sowat 7 000 mense praat Groenlands op die Deense vasteland.

Bronne[wysig]