Tarkastad

Tarkastad
'n Hoofstraat op Tarkastad, 2012
Tarkastad
Tarkastad
Koördinate: 32°00′23″S 26°15′37″O
Land	Suid-Afrika
Provinsie	Oos-Kaap
Distriksmunisipaliteit	Chris Hani
Plaaslike Munisipaliteit	Tsolwana
Stigting	1862
Oppervlak
- Stad	1,89 km²  (0,7 vk m)
Hoogte	1 293 m (4 242 vt)
Bevolking (2001)
- Stad	1 858
- Digtheid	980/km² (2 538,2/myl2)
Tydsone	SAST (UTC+2)
Poskode	5370

Die hoeksteen van Tarkastad se NG kerkgebou is op 1 Junie 1877 gelê en die gebou is op 12 Februarie 1880 ingewy.

'n Regeringsgebou in die middedorp.

Ds. P.W. Jordaan het die hoeksteen van die NG kerksaal, bekend as Ons Moedersaak, op 28 Februarie 1952 gelê. Die boumeester was F.P. van Heerden.

Ds. D.J.J. van Velden, van 1897 tot 1903 die vierde leraar van die NG gemeente Tarkastad, is tydens die Anglo-Boereoorlog verdink van pro-Republikeinse simpatieë en meer as 'n jaar lank in 'n interneringskamp aangehou.

'n Engelse kerkie op die hoek van Van Reenen- en Naudéstraat.

Die Vrymesselaarslosie op Tarkastad.

Ou geboue in die middedorp.

Dié gebou het eens Tarkastad se poskantoor gehuisves.

Nog 'n vervalle handelsgebou in die middedorp.

Soos die gebruik was al langs die roetes van die Simboliese Ossewatrek van 1938, het ook die inwoners van Tarkastad 'n stapel klippe gepak om die eeufees te gedenk. Dit staan op die perseel van die NG kerk.

Dié gebou, soos die meeste handelsgebou in die middedorp, is erg verwaarloos.

'n Vervalle huisie op Tarkastad, een van tallose.

Tarkastad is 'n klein dorp in die provinsie Oos-Kaap, Suid-Afrika, sowat 78 km oos van Cradock en 64 km wes van Queenstown, 1 310 m bo seespieël en in die middel van 'n goeie skaapboerderygebied. 'n Takspoorlyn verbind die dorp met Bowker's Park-stasie, 4 km wes van Queenstown, maar die lyn is in 1988 vir spoorverkeer gesluit en word nie meer in stand gehou nie.

Geskiedenis

Die eerste koloniste het hulle voor die Groot Trek in die huidige distrik Tarka kom vestig. Omdat Queenstown, waar 'n plaaslike gemeente van die NG Kerk eers in 1853 gestig is, steeds meer as 60 km van die latere Tarkastad geleë was en dus net 'n geringe verbetering beteken het vir die bearbeiding van die plaaslike lidmate wat lank die byna 80 km na Cradock moes aflê om hulle kerklike voorregte te geniet, gee die behoefte aan 'n kerkplaas in 1862 aanleiding tot die stigting van die dorp op die plaas Boschfontein in die voorheuwels van die Winterberg. Die gemeente Tarkastad is toe plegtig in 1863 gestig met ds. J.G.S. de Villiers as eerste leraar. Die eerste kerkie in Greystraat is in 1880 verwissel vir die huidige, sierlike kerkgebou op sy ruim erf in die middel van die dorp.

Sowat drie dekades voor die dorpstigting het die distrik Tarka twee manne aan die Groot Trek afgestaan wat later roem sou verwerf: Andries Hendrik Potgieter en Piet Retief. Met die uitbreek van die Tweede Vryheidsoorlog in 1899, toe die twee Boererepublieke in 'n doodstryd gewikkel was teen die Britse magte, het talle lidmate van Tarkastad na die wapen gegryp en meer as een het voor die vuurpeloton die hoogste prys vir sy nasieliefde betaal. Digby die dorp het die burgers onder genl. Jan Smuts 'n Engelse patrollie in 'n hinderlaag gelok en uitgewis. En die destydse leraar, ds. D.J.J. van Velden, wat verdink is van pro-Republikeinse simpatie, is meer as 'n jaar in 'n interneringskamp aangehou.

Inwoners van Tarkastad het geesdriftig meegedoen aan sowel die honderdjarige herdenking van die Groot Trek in 1938 as die Rapportryer-feesplan met die oog op die inwyding van die Voortrekkermonument op 16 Desember 1949. Die rapport se roetes van 1949 was simbolies van 'n feestelike aantog na die monument in Pretoria. Die ryers was 10 weke lank op pad, het byna 400 plekke langs die 15 roetes aangedoen en in die geheel, as al 15 roetes saamgetel word, amper 23 000 km te perd afgelê.

Tarkastad was een van die plekke wat die rapportryers besoek het en wel op roete 6(b), 'n afwyking van roete 6 oor Tarkastad, Cradock en Hofmeyr omdat eersgenoemde, laasgenoemde en Middelburg, Kaap op 'n roete wou lê en omdat dit met 'n enkele roete 6 uit Oos-Londen onmoontlik sou wees. Die rapportryers verlaat die hawestad op 22 Oktober 1949, ry oor Berlin en King William's Town en bereik Adelaide op 28 Oktober waar 'n goed georganiseerde fees gehou is. Ná 'n fees op Bedford op 29 Oktober en 'n besoek aan die geskiedkundige kerkie op Glen Lynden die volgende dag, begelei 'n perdekommando, motorstoet en baie ander geesdriftiges op fietse en te voet die rapportryers na die monumentterrein toe hulle laat die middag van Donderdag 3 November 1949 Tarkastad binnegery kom.

Daar is toesprake gelewer en 'n diens waargeneem deur ds. Nico de Lange. Hier is ook die boodskap van die gemeenskap van Tarkastad voorgelees. Fanie van Heerden, 'n 81-jarige oudstryder, het 'n fakkel op die monument aangesteek en groot toejuiging van die skare ontlok. Op die sportterrein het die rapportryers en inwoners die aand gesellig met vleisbraaiery, boeresport ens. deurgebring. Ds. Nico de Lange het as feesredenaar opgetree en ná sy rede is 'n aanskoulike wiel teen die hang van die berg met brandende fakkels gevorm. Die volgende oggend het die rapportryers ná huisgodsdiens vertrek op pad na Cradock.

Munisipaliteit

Tarkastad het op 29 Julie 1864 sy eie raad van kommissarisse gekry en 'n dekade later, op 3 September 1874, is die distrik Tarka geproklameer. Munisipale status is in 1883 verwerf. Die skrywer W.C. Scully het in 1877 posmeester geword en is later opgevolg deur nog 'n skrywer, R. (Betram) Mitford. Die munisipaliteit het die honderdjarige bestaan van die dorp in 1962 gevier met onder meer die publikasie van Tarkastad eeufees/centenary, 1862-1962. Gedenkalbum / souvenir album, wat 80 bladsye beslaan het met illustrasies. In 1978 berig die Amptelike Suid-Afrikaanse Munisipale Jaarboek dat die dorp se inwoners 4 395 getel het, waarvan 690 wit, 600 bruin, vyf Indiërs en 3 100 swart was. Destyds was die dorp se belasbare waarde R1 682 340.

Die dorp se openbare biblioteek is reeds in 1871 opgerig en het in 1986, toe die biblioteek geaffilieer was by die destydse Kaapse Provinsiale Biblioteekdiens, 589 volwasse en 290 kinderlede gehad met 'n jaarlikse boeksirkulasie van 28 149.

Die destydse munisipaliteit het voorsiening gemaak vir 'n nege-putjie-gholfbaan, 'n rolbalbaan, tennisbane, twee rugbyvelde, swembad, jukseibaan, kinderspeelterrein en 'n krieketveld. In die jare 60 of 70 is 'n moderne pawiljoen op die Van Riebeeckpark-skouterrein opgerig. Die stadsaal bied sitplek aan 400 mense. Die elektrisiteitsvoorsieningskema is in 1960 teen 'n koste van R59 000 verander na wisselstroom.

Nuwe bedeling

Met die oorgang na die nuwe munisipale bedeling omstreeks 2000, het Tarkastad deel geword van die Tsolwana Plaaslike Munisipaliteit in die Chris Hani-distriksmunisipaliteit. Die ander vername dorp in die plaaslike munisipale gebied is Hofmeyr.

In die munisipale verkiesing van 2011 het die African National Congress 15 089 van die 20 539 uitgebragte stemme op hom verenig, vergeleke met die Congress of the People se 1 940 en die Demokratiese Alliansie se 1 724. Onafhanklike kandidate het 1 618 stemme gekry. Vergeleke met die 2006- munisipale verkiesing het die ANC se aandeel gedaal van 88,2% tot 73,5% en die DA s'n toegeneem van 6% tot 8,4%. Cope het eers ná die verkiesing van 2006 ontstaan. Tarkastad val in sy geheel in wyk 4 van dié munisipaliteit. In dié wyk het die ANC in 2011 1 265 (1 623 in 2006) stemme gekry, 'n onafhanklike kanditaat 675 stemme en die DA 390 (245 in 2006). 2 356 van die 3 552 geregistreerde kiesers het gestem, oftewel 66,3%.

In 2011 se verkiesing het die ANC al vier wyke in Tsolwana gewen. In die toewysing van proporsionele setels het dié party nog drie setels gekry, vergeleke met Cope en DA se een elk. Die totaal van nege is een minder as na dié 2006-verkiesing, toe die ANC nege en die DA vyf setel beheer het.

Oorsprong van die naam

Die dorp het sy naam ontleen aan dié van die Tarkarivier wat 13 km suidwes van die dorp verbyvloei. Daar is drie verklarings omtrent die oorsprong van die naam: Die eerste is dat dit 'n Xhosa-woord is wat "mooi meisie" beteken. Sodra 'n Xhosa-meisie 'n sekere ouderdom bereik, word sy na die Tarkarivier geneem vir haar ontgroening. Die tweede is dat "tarka" afgelei is van die Xhosa-woord "amataka", wat "voël" beteken. Die derde en mees geloofwaardige verklaring is dat "tarka" aan 'n Khoi-taal ontleen is. Die oorspronklike woord was "Taraxa!as" met "taras" wat "vrou" beteken, "taraxa" (of ook "taracha") "ryk aan vroue" en "!as" wat dui op 'n plek of stad. Dus is dit 'n plek ryk aan vroue.

Die vorm "Tarka" kom die eerste keer voor in 1752 in Beutler se "Journaal" toe hy melding maak van "een rivier Tarka of het Vrouwenrivier", terwyl in goewerneur Joachim van Plettenberg se "Dagverhaal van de landreyse . . . in den jaar 1778 gedaan" op 18 September sprake is van "de Traka of Vrouwen Rivier". Ook die reisiger Barrow in sy Travels praat van die "Traka or Maiden River".

Boerdery

Daar word met wol en beeste geboer in die distrik. Wildsboerdery het ook 'n groot ekonomiese bedryf geword en Tarkastad is die middelpunt vir trofeejag van Oos-Kaapse en Karoo-wildspesies. Beroepsjagters gebruik die dorp as basis en so het 'n aansienlike bedryf hier ontstaan wat wildteel, -vang, -verkope, taksidermie en die verkoop van jagtoerusting insluit.

Toerisme

Die eerste pastorie van die NG gemeente Tarkastad is tot nasionale gedenkwaardigheid verklaar. Dit is opgerig in 1864, kort ná die koms van die eerste NG leraar, ds. J.G.S. de Villiers, is 'n verdiepinghuis en het ongewone traliewerk van gegote yster.

Van die bekenste bakens in die distrik wat gereeld afgeneem word, is die plat heuwels Marta en Maria. Omdat die eerste boere hulle reeds omstreeks 1795 hier gevestig het, kan ou watermeule vandag nog in die omgewing gesien word. In die Winterberg is voetslaanpaai, soos die moeilike drie dag lange sirkelroete oor 45 km by Toorberg en die Groot Winterberg-voetslaanroete.

San-rotskuns is te sien op die plaas Grootvlei noord van die dorp. Ander natuuraktiwiteite in die omgewing naas jag, is forelhengel, besoeke aan die Nasionale Bergkwaggapark en die Tsolwana-natuurreservaat asook talle privaat wildsplase.

Tarkstad het nie 'n plaaslike hotel of noemenswaardige gastehuise nie, maar van die verblyf vir toeriste op omliggende plase, is onder meer die Knowsley Country Cottage in die Winterberg-bewarea, die Redcliffe Country House, Carrickmoor-gasteplaas, Braeside Country Cottage, Glen Etive Cottage op die geskiedkundige plaas wat reeds meer as 125 jaar in die Scott-familie se besit is, en die Blanco-gasteplaas-en-vakansieoord.

Distrik Tarka

Die distrik Tarka is op 3 September 1874 geproklameer en beslaan 3 196 km². Dit grens in die weste aan die distrikte Cradock en Maraisburg, in die suide aan Bedford en Adelaide, in die ooste, waar die Swartkeirivier 'n natuurlike grens vorm, aan Queenstown en in die noord aan die distrikte Sterkstroom en Molteno. Die distrik is redelik yl bevolk en bergagtig, met hoogtes bo seevlak wat wissel van 1 200 tot 2 300 m. In die noord het die Bamboesberg op die grens met die distrik Molteno pieke van hoër as 2 000 m, terwyl die Groot Winterberg in die suide tot 2 370 m reik en die grens met die distrik Adelaide vorm. In die mees suidwestelike uithoek is die Baviaansrivierberg.

Die vernaamste riviere wat deur die dustrik sny, is die Swartkei asook die Tarka en sy takriviere: die Riet, Spring Valley, Elandsfontein en Elands.

Volgens die landbousensus van 1967/'68 was daar indertyd 259 959 skape, 14 828 bokke en 13 378 beeste in die distrik.

Sien ook

• Lys van dorpe in Suid-Afrika
• NG gemeente Tarkastad

Bekende boorlinge

• Gezelle Bernard, Suid-Afrikaanse spiesgooier

Bronne

• Albertyn, W. (red.). 1978. Amptelike Suid-Afrikaanse munisipale jaarboek. Pretoria: S.A. Vereniging van Munisipale Werknemers (nie-Politiek).
• Botha, M.C. 1952. Die Huldejaar 1949. Johannesburg: Voortrekkerpers Beperk.
• Brown, dr. E. 1973. Gemeentelike geskiedskrywing van die Afrikaanse kerke van gereformeerde belydenis - 'n kompilasie en kerk-historiese oorsig. Durban: Drakensbergpers.
• Bulpin, T.V. (2001). Discovering Southern Africa. Cape Town: Discovering Southern Africa Publications cc.
• Maeder, ds. G.A. en Zinn, Christian. 1917. Ons Kerk Album. Kaapstad: Ons Kerk Album Maatschappij Bpkt.
• Nienaber, P.J. 1963. Suid-Afrikaanse pleknaamwoordeboek, deel 1. Kaapstad, Johannesburg: Suid-Afrikaanse Boeksentrum.
• Olivier, ds. P.L., 1952. Ons gemeentelike feesalbum. Kaapstad en Pretoria: N.G. Kerk-uitgewers.
• Potgieter, D.J. (ed.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
• Op Pad in Suid-Afrika. B.P.J. Erasmus. 1995. ISBN 1-86842-026-4

Eksterne skakels

• Inligting oor Tarkastad (sa-venues.com) (en)
• The worst road in the country, Die Burger, 1 Februarie 2012 (en)
• Oorlog teen renosterstropers verskerp, Die Burger, 18 Augustus 2011
• Hope sneeu 'laat ysbere uitkom' en Oos-Kaap bibber, Die Burger, 26 Julie 2011
• Gezelle Bernard, wat haar laerskoolloopbaan op Tarkastad begin het, blink uit in ateltiek op Potchefstroom