Tassimo

in Wikipedia, die vrye ensiklopedie
Spring na: navigasie, soek
Die eerste generasie Tassimo-masjiene is deur Braun vervaardig

Tassimo is 'n handelsmerk van die internasionale voedselvervaardiger Kraft Foods vir 'n stelsel van klein porsies koffie, espresso, kakao, tee en melk wat met spesiale koffiemasjiene berei word.

Alle warm dranke word in klein plastiekkapsules, sogenaamde T-Discs, aangebied wat met aluminiumfolie verseël word om aroma en smaak te bewaar. Die inhoud is presies vir een koppie afgemeet. T-Discs met ultragefiltreerde vloeibare melk word ingespan om koffiespesialiteite soos cappuccino of latte macchiato te berei. Deur middel van 'n strepieskode op die aluminiumdeksel, wat deur Tassimo-koffiemasjiene gelees kan word, word die brouproses en benodigde hoeveelheid water vir elke warm drank presies aangepas.

Die Tassimo-koffiemasjiene is deur Kraft Foods ontwikkel, maar aanvanklik deur Saeco International Group S.p.A. en Braun vervaardig en versprei. Die huidige reeks masjiene word sedert 2008 deur die Duitse Robert Bosch GmbH vervaardig nadat Braun die produksie van klein kombuistoestelle gestaak het.

Die Tassimo-stelsel is in 2004 op die Franse mark ingevoer en word intussen ook in Switserland, Duitsland, Oostenryk, die Verenigde Koninkryk, Spanje, Kanada en die Verenigde State bemark.