Tempo (weekblad)

in Wikipedia, die vrye ensiklopedie
Spring na: navigasie, soek
Die weekblad Tempo se mashoof.
'n Voorblad.

Tempo was 'n onafhanklike weekblad wat elke week sedert 11 September 2008 op Vredendal in die Wes-Kaap uitgegee is tot omstreeks 2010.

Ontstaan[wysig]

Ná 'n uitgerekte regstryd met een van die land se grootste mediagroepe, is een van die beslote korporasies wat by die Swartland en Weskus Herald betrokke was, in 2008 gelikwideer. Dit het meegebring dat die laaste uitgawe op 4 September 2008 verskyn. Net die volgende week is 'n nuwe weekblad gebore, naamlik Tempo.

Verspreiding[wysig]

Tempo is elke Donderdag in die hele gebied van die Weskus-distriksmunisipaliteit versprei. In die Swartland sluit dit dorpe soos Malmesbury, Moorreesburg en Darling in, in Saldanhabaai Vredenburg, Saldanha, Langebaan en Hopefield, in die Bergrivier se munisipale gebied op Velddrif, Laaiplek, Redelinghuys, Piketberg en Porterville, in die Cederberg op Lambertsbaai, Citrusdal en Clanwilliam en in Matzikama op Vredendal, Lutzville, Klawer en Vanrhynsdorp.

Personeel[wysig]

Soos by enige tipies plattelandse weekblad, doen Tempo se personeel "iets van alles". Verslaggewers neem ook foto's, lê bladsye uit en lewer koerante af. Laasgenoemde strek tot die koerant se voordeel, want nie alleen kom hulle so van nuusgebeure te hore nie, maar hulle bly ook in aanvoeling met verkope-tendense: As hulle met 'n dorp se nuusdekking laat slaplê, tel hulle gou 'n afwaartse neiging in verkope op die bepaalde dorp op. Die personeel het met die eerste uitgawe bestaan uit uitgewer Gerard Grobler, verslaggewers Morné van Rooyen (Swartland, Saldanhabaai en Velddrif), Ilna Grobler (Bergrivier), Tossie Engelbrecht (Matzikama), Elizna Mouton (Cederberg), grafiese kunstenaar Esmarelda Seroon en bemarker Thea Smit.

Kantore[wysig]

Tempo het 'n kantoor op Vredendal en op Porterville gehad, maar ook 'n sterk teenwoordigheid aan die Weskus.

Mededinging[wysig]

Met die konsolidering van gemeenskapskoerante binne die groot mediagroepe soos Independent Newspapers, Media24 en Caxton, het daar min plekke in Suid-Afrika oorgebly waar twee weekblaaie op dieselfde plek, op dieselfde dag om die dieselfde mark meeding. Tempo maak van die Weskusstreek 'n noemenswaardige uitsondering. Op Malmesbury ding hy mee met die Media24-weekblad Swartlander, in Saldanhabaai en op Velddrif met die Media24-weekblad Weslander en in Matzikama en Cederberg met die onafhanklike Ons Kontrei.

Redaksionele beleid[wysig]

Tempo poog, soos sy voorganger, om 'n polities neutrale standpunt te handhaaf, hoewel die koerant nie skroom om standpunt in te neem oor kwessies van gemeenskapsbelang nie.

Eksterne skakel[wysig]