The Namibian

in Wikipedia, die vrye ensiklopedie
Spring na: navigasie, soek


The Namibian is Namibië se grootste en ook mees uitgesproke dagblad, wat in 1985 gestig is om vergrype deur die destydse Suid-Afrikaanse veiligheidsmag in die indertydse Suidwes-Afrika aan die kaak te stel en voorbrand vir die land se onafhanklikheid te maak, maar sedert onafhanklikwording is hy 'n ewe kritiese waghond van die Swapo-regering.

Ontstaan[wysig]

Die koerant het die eerste keer in 1985 verskyn ná Gwen Lister, wat steeds uitgewer is, by die Windhoek Observer bedank het. In Mei die vorige jaar het die Publikasieraad in Pretoria die Windhoek Observer verbied, merendeels weens Lister se politieke beriggewing. Sy het geld in die buiteland ingesamel, die verbod voor die Appèlraad vir Publikasies in Pretoria uitgedaag en daarin geslaag om die verbod tersyde te laat stel. Terwyl sy egter in Suid-Afrika was om teen dié verbod te appelleer, het die bestuur van die Observer haar gedemoveer van politieke redakteur tot gewone verslaggewer. Die hele personeel is afgedank ná hulle hul teenkanting te kenne gegee het en Lister het uit protes bedank.

Toe Lister in Junie 1988 vier maande swanger was met haar seun, is sy aangehou omdat die regering wou weet waar sy 'n geheime dokument bekom het wat besonderhede verstrek het van 'n plan om groter mag aan die polisie te gee en 'n noodtoestand in Namibië af te kondig. Deurentyd het sy en haar personeel dreigoproepe gekry, hoofsaaklik van wittes wat omgekrap was omdat sy menseregtevergrype deur die Suid-Afrikaanse veiligheidspolisie aan die kaak gestel het.

Later daardie jaar is The Namibian se kantoor feitlik deur die verregse Wit Wolwe verwoes. Hulle het die kantoor met brandbomme aangeval, traangas in die lugversorgingstelsel gesit en die verslaggewers van stryk probeer bring met gedurige doodsdreigemente.

Onafhanklikwording en die jare negentig[wysig]

Hoewel Namibië uiteindelik die Suid-Afrikaanse koloniale oorheersing op 21 Maart 1990 kon afwerp, het The Nambian allermins 'n lyfblad van die regerende Swapo geword toe dié party die Namibiese bewind oorneem. Die koerant het ewe onafhanklik en uitgesproke gebly en Lister moes steeds intimidasie verduur, weereens van die regering, maar ook van burgerlike groepe wat ontevrede was met die koerant se waghondrol.

Die huidige eeu[wysig]

In 2000 het die destydse sekretaris-generaal van die VN, Kofi Annan, die koerant op die 15de herdenking van sy stigting aangeprys vir sy onverskrokkenheid en gesê die koerant het dapper sy plig uitgevoer onder moeilike en dikwels gevaarlike omstandighede.

In Desember 2001 het die Namibiese kabinet 'n algehele verbod op reklame van staatsdepartemente in The Namibian geplaas oor wat hy die koerant se "teenregeringsberiggewing" genoem het. Die verbod is vandag nog van krag. In Mei 2002 het die destydse president Sam Nujoma dit 'n stappie verder gevoer toe hy staatsdepartemente en -amptenare verbied het om die koerant met regeringsgeld te koop.

In 2008 het die koerant opnuut die regering die harnas ingejaag toe hy met 'n SMS-meningsdiens begin het wat dit vir Namibiërs moontlik maak om in 'n kits hulle mening te lug en vir die koerant om daagliks vars menings oor enige onderwerp te publiseer.

Die koerant se sirkulasie het in die dekade ná 2000 toegeneem tot meer as 20 000 en daarna verstommende groei aangeteken tot verkope van sowat 60 000 in 2012, twee en 'n half keer meer as die land se naasgrootste dagblad[1], hoewel die Sirkulasieburo se syfers vir die tweede kwartaal van 2012 slegs 35 948 was[2]

Sien ook[wysig]

Bron[wysig]

Verwysings[wysig]