Tim Berners-Lee

in Wikipedia, die vrye ensiklopedie
Spring na: navigasie, soek

Tim Berners-Lee is 'n Britse uitvinder en word beskou was die vader van die wêreldwye web.

Belangrikste prestasies[wysig]

Tim Berners-Lee

Timothy Berners-Lee, Britse rekenaarwetenskaplike, sagteware-ingenieur en direkteur van die World Wide Web Consortium (W3C), het 'n groot bydrae gelewer tot die ontploffing van die inligtingera deur sy uitvinding van die netwerkinligtingstelsel bekend as die Wêreldwye Web. Die Wêreldwye Web het 'n onmisbare hulpmiddel geword vir globale inligtingdeling deurdat gebruikers gekoppelde dokumente op enige netwerkrekenaar kan oopmaak deur bloot op 'n uitgeligte item op die rekenaarmonitor te klik.

In 1990 het Berners-Lee die sagteware vir die eerste Webbediener en kliënt geskryf en die spesifikasies vir BA (Bronadres), HTTP (Hiperteksoordragprotokol) en HTML (hiperteksmarkeertaal) waarvan die Web afhang, gedefinieer. As direkteur van die World Wide Web Consortium speel hy steeds 'n belangrike rol in die ontwikkeling van sy skepping.

Sy talle toekennings sluit in die Kilby Foundation se Toekenning vir Jong Nieuligter van die Jaar (1995), die Charles Babbage-toekenning (1998) en die Pionierstoekenning van die Electronic Freedom Foundation (2000). Hy het ook eregrade van verskeie universiteite ontvang en is 'n distinguished fellow van die Britse Rekenaarvereniging, 'n ere-fellow van die Instituut vir Elektriese Ingenieurs en 'n MacArthur fellow.

Lewensgeskiedenis[wysig]

Tim Berners-Lee, wat die wêreldwye web ontwerp het (2009).

Timothy John Berners-Lee is op 8 Junie 1955 in Londen gebore as seun van Conway en Mary Berners-Lee. Hy het sy eerste rekenaar, 'n kartonreplika van Britanje se eerste kommersiële rekenaar, The Ferranti Mark 1, gebou terwyl hy nog 'n kind was. In 1973 het hy by Queen's Kollege, Oxford Universiteit ingeskryf en drie jaar later 'n Baccalaureus Artium in teoretiese fisika met lof behaal. Na graduering het hy as onafhanklike rekenaarsagtewarekonsultant op verskeie sagtewareskryfprojekte gewerk.

In 1980 het hy ses maande spandeer by CERN, die Europese Deeltjiefisikalaboratorium naby Geneva, Switserland en 'n program, Enquire, vir sy eie privaat gebruik geskryf. Enquire het direkte skakels tussen elektroniese lêers en inligting wat geberg moes word, gemaak deur willekeurige assosiasie. Hierdie konsepte het uiteindelik die basis gevorm vir die ontwikkeling van die Wêreldwye Web. Hy het vier jaar later as 'n stelselingenieur na CERN teruggekeer en in 1989 'n 'globale hiperteksprojek' voorgestel, naamlik die Wêreldwye Web wat navorsers in staat sou stel om mekaar se data te gebruik.

Die stelsel was gebaseer op die vindingryke integrasie van hiperteks met die Internet. Deur kennis te kombineer in 'n globale hiperteksruimte waarin enige netwerk-toeganklike inligting na verwys kon word met 'n enkele Universele Dokumentidentifiseerder (UDI/URI), het Berners-Lee aan navorsers toegang gegee tot hulle gemeenskaplike eksperimente ongeag van waar hulle werk en watter rekenaars hulle gebruik.

In 1990 het hy begin om die sagteware vir die Webblaaier en sy onderliggende protokol te skryf en dit het die volgende ingesluit:

  • Die hiperteksmarkeertaal, of HTML;
  • Die hiperteksoordragprotokol, die http:// wat meeste webadresse vooraf gaan; en
  • Die bronadres, of BA's.
Die eerste Webbediener ter wêreld in die CERN.

Die program WorldWideWeb is aanvanklik in Desember 1990 in CERN beskikbaar gestel en in die somer van 1991 is die gratis Websagteware op die Internet geplaas. Namate die aantal webkliënte toegeneem het van omtrent 10 na 100 000 tussen 1991 en 1994, het Berners-Lee volgehou om sy aanvanklike BA-, HTTP- en HTML-spesifikasies te verfyn. In 1994 het hy aangesluit by die Laboratorium vir Rekenaarwetenskap by die Massachusetts Instituut vir Tegnologie (MIT).

Aangesien CERN nie toegerus was om die vinnig groeiende onderneming te huisves nie, het Berners-Lee die World Wide Web Consortium (W3C) in September 1994 gestig met sy basisse by Massachusetts Instituut vir Tegnologie (MIT), by die Institut National de Recherche en Informatique et en Automatique (INRIA) in Frankryk en by Keio Universiteit in Japan. W3C is 'n oop forum van maatskappye en organisasies wat die Webontwikkeling koördineer en dien as standaardeorganisasie vir die Web. As direkteur van W3C dra Berners-Lee steeds by tot die ontwikkeling van die Wêreldwye Web en verken die volle potensiaal daarvan.

Eksterne skakels[wysig]

Commons-logo.svg
Wikimedia Commons het meer media verwant aan:
Tim Berners-Lee (kategorie)