Tribune Tower

in Wikipedia, die vrye ensiklopedie
Spring na: navigasie, soek
Tribune Tower

Tribune Tower is 'n wolkekrabber in 425 North Michigan Avenue in Chicago (Illinois, Verenigde State). Die gebou in die Neogotiese styl is in die tydperk tussen 1923 en 1925 opgerig en huisves onder meer die hoofkwartier van die invloedryke dagblad Chicago Tribune en die ateljee van die radiostasie WGN Radio. Die wolkekrabber, wat deur Raymond Hood en John Mead Howell ontwerp is, het 'n hoogte van 141 meter en toon sekere ooreenkomste met die katedraal van Rouen se Tour de Beurre ("botter-toring") in Normandië (Frankryk) en die toring van die katedraal in Mechelen (Vlaandere).

Geskiedenis[wysig]

Die dagblad Chicago Tribune het in 1922 'n internasionale ontwerpkompetisie vir sy nuwe hoofkwartier met 'n prysgeld van VSA-$ 50 000 vir die "pragtigste en mees opvallende gebou ter wêreld" aangebied. Die kompetisie het groot publisiteit in die media verkry, en die meer as 260 inskrywings, wat ontvang is, word as 'n unieke wentelpunt in die geskiedenis van die Amerikaanse argitektuur beskou.

Die Neo-Gotiese ontwerp van die New Yorkse argitekte Howells & Hood (John Mead Howells en Raymond Hood) met steunbere bo-op was die wenner. Soos by Hood se ander projekte is die beeldhouwerk en versierings deur die Amerikaanse kunstenaar Rene Paul Chambellan uitgevoer.

Op 11 April 2006 is die McCormick Tribune Freedom Museum, wat twee verdiepings beslaan, in die gebou geopen.

Argitektuur[wysig]

Versierings oor die hoofingang

Die Tribune Tower is 'n beton-staalraamwerk-ontwerp, met fasades wat van Indiana-kalksteen in verskillende skakerings van grys gemaak is, en die totale boukoste het VSA-$ 8 miljoen beloop. Vertikale steunbere, wat van die massiewe blok van laer verdiepings na bowe loop, skep die optiese indruk dat die wolkekrabber hoër sou verrys as oor 36 verdiepings. Die argitektoniese besonderhede van die wolkekrabber word snags deur vloedligte verlig.

Die gebou pronk met grappige verwysings na die twee argitekte - reliëfs naby die hoofingang wat Robin Hood (Raymond Hood) en 'n huilende hond (John Mead Howells) uitbeeld.

Nog voor die oprigting van die wolkekrabber het die Chicago Tribune se korrespondente op versoek van die uitgewer, kolonel Robert R. McCormick, rotse en bakstene van historiese besienswaardighede van dwarsoor die wêreld saamgebring. Baie van hierdie stene is by die bou van die laer verdiepings gebruik en van 'n inskrif voorsien wat na hulle geografiese oorspronge verwys.

Die 136 fragmente sluit stene van die katedrale van Trondheim (Noorweë) en Parys (Notre-Dame), Tadj Mahal (Indië), die Groot Muur (Sjina), Abraham Lincoln se graf, die Groot Piramide, Alamo, die Berlynse Muur en ander in. Een van die laaste byvoegings was 'n stukkie staal van die New Yorkse Wêreldhandelsentrum se bouvalle.

Rene Paul Chambellan se bydraes sluit 'n aantal geutspuite en die beroemde Aesop-reliëf oor die hoofingang in. Een van die geutspuite, 'n padda, is 'n grappige verwysing na Chambellan en sy Franse afkoms.

Eksterne skakels[wysig]