Triglaf

in Wikipedia, die vrye ensiklopedie

Triglaf (letterlik "driekoppig") is ’n god of samestelling van gode in die Slawiese mitologie, soortgelyk aan die Drie-enige God in die Christendom of Trimoerti in Hindoeïsme. Hy word dikwels beskou as dieselfde god as Trojan.

Drie gode[wysig | wysig bron]

Triglaf is ’n eenheid van drie gode. Die gode wissel van plek tot plek en tyd tot tyd. Volgens ’n vroeë weergawe is dit Swarog, Peroen en Dazjbog. Later is Dazjbog vervang met Swetowid of Weles. Hy kon ook ’n samestelling van mindere gode gewees het.

In een legende het Triglaf ’n sluier op, so heilig dat hy nie die bose dade van die mens kan sien nie. Hy verskyn selde tussen sterflinge.

Triglaf word voorgestel as ’n driekoppige man, soms met ’n goue blinddoek oor sy oë, of ’n man met drie bokkoppe. Verskeie tempels wat aan Triglaf gewy is, het bestaan naby Szczecin, Pole. Volgens die biografieë van die Duitse vegter-biskop sint Otto, wat in die vroeë 12de eeu verskeie militêre-pastorale ekspedisies gelei het na die streke van die Slawiese stamme wat naby die Oossee gewoon het, was Triglaf die belangrikste Slawiese god en was die tempels in Szczecin asemrowend. Toe die Slawiërs gekersten is, is die tempels vernietig.

Drie koppe[wysig | wysig bron]

Triglaf se koppe stel die hemel, aarde en onderwêreld voor. Sommige priesters beweer Triglaf het drie koppe gehad omdat hy oor al drie ryke (hemel, aarde en hel) regeer het en dat hy geblinddoek is sodat hy nie die mens se sondes kon sien nie.

Sommige beweer dat Triglav, die hoogste berg in Slowenië, na dié god genoem is.

Swantewit en Triglaf[wysig | wysig bron]

Triglaf en ’n ander god, Swantewit, word albei verbind met waarsêery en word deur die perd gesimboliseer. ’n Moontlik veelseggende verskil is dat Swantewit ’n wit perd gehad het en Triglaf ’n swarte, en dat Swantewit voorgestel is met vier koppe. Swantewit is ook verbind met oorwinning in oorlog, die oes en handel.

Eksterne skakels[wysig | wysig bron]