Tsjeko-meer

in Wikipedia, die vrye ensiklopedie
Spring na: navigasie, soek
Tsjeko-meer
Чеко
Ligging van Tsjeko-meer op 'n kaart (Rusland)
Tsjeko-meer
Tsjeko-meer
Koördinate: 60°57′50″N 101°51′36.76″O
Land Vlag van Rusland Rusland
Gebied Krasnojarsk-krai,
Siberië
Oppervlakte 0,258 km²
Diepte 50 m

Die Tsjeko-meer (Russies: Чеко) is ’n klein varswatermeer in Siberië, Rusland, naby die Podkamennaja Toengoeska-rivier in Krasnojarsk-krai. Dit is ’n komvormige meer van 708 m lank, 364 m breed en sowat 50 m diep.

Wetenskaplikes bespiegel dat die meer geskep is tydens die Toengoeska-voorval, ’n ontploffing op 30 Junie 1908 wat meer as 2 000 km² Siberiese taiga verwoes het. Sommige vermoed die meer, wat sowat 8 km noordnoordwes van die voorval se hiposentrum lê, is gevorm deur ’n fragment wat die grond getref het. [1] In 1961 is in ’n ondersoek geraam dat die meer minstens 5 000 jaar oud is na aanleiding van meters diep slikbesinksel op die bodem;[2] nuwer navorsing dui egter daarop dat net sowat ’n meter van die sliklaag "normale besinksel" is en dat die meer baie jonger, sowat 100 jaar oud, is.[3]

Klanktoetse is ook uitgevoer wat daarop dui dat die bodem keëlvormig is, wat ooreenstem met ’n impak-krater, en dit steun die teorie. Die lang as van die meer wys ook in die rigting van die episentrum van die Toengoeska-voorval ’n paar kilometer daarvandaan.[4] Verder dui magnetiese lesings op ’n moontlike stuk rots van ’n meter groot onder die meer se diepste punt, wat ’n fragment kan wees van die liggaam wat ontplof het.[4] Daarteenoor het navorsers van die Imperial College in Londen bevind dat baie van die bome om die meer ouer as 100 jaar is en dat die meer dus nie in 1908 gevorm kon gewees het nie.[5]

In 2009 het navorsers van die Universiteit van Bologna die meer se bodem ondersoek.[6][7] ’n Studie van die besinkel, isotope en stuifmeel het volgens hulle daarop gedui dat "die Tsjeko-meer gevorm is in die tyd van die Toengoeska-voorval."

Verwysings[wysig]

  1. Gasperini, L. et al. (2001). “Geophysical/sedimentological study of a lake close to the epicenter of the great 1908 Siberian (Tunguska) Explosion”. NGF Abstracts and Proceedings (1): 29–30. Besoek op 2008-05-27.
  2. Kirill Florensky (1963). “Preliminary results from the 1961 combined Tunguska meteorite expedition”. Meteoritica 23: 3–29. Besoek op 2007-06-26.
  3. Gasperini, L. et al. (April 2008). “Reply - Lake Cheko and the Tunguska Event: impact or non-impact?”. Terra Nova 20 (2): 169–172. DOI:10.1111/j.1365-3121.2008.00792.x. Besoek op 2008-05-27.
  4. 4,0 4,1 Gasperini, L. et al. (June 2008). “The Tunguska Mystery”. Scientific American: 80–86. Besoek op 2008-06-08.
  5. Rincon, Paul (2008-06-30). “Fire in the sky: Tunguska at 100”. BBC News. URL besoek op 2008-07-01.
  6. Gasperini, Luca et. al. (2009). “Sediments from Lake Cheko (Siberia), a possible impact crater for the 1908 Tunguska Event”. URL besoek op 30 June 2010.
  7. Gasperini, Luca, et. al. (December, 2009). “Sediments from Lake Cheko (Siberia), a possible impact crater for the 1908 Tunguska Event”. Terra Nova 21 (6): 489–494. DOI:10.1111/j.1365-3121.2009.00906.x. Besoek op 30 June 2010.

Eksterne skakels[wysig]