Tsjernjachowsk

Tsjernjachowsk Черняховск
Kaart	Wapen
	Vlag
Land	Rusland
Federale distrik	Noordwes-Rusland
Oblast	Kaliningrad
Rajon	Tsjernjachowsk
Koördinate	58°38′N 21°49′O
Stigting	1336
Stadstatus	10 Oktober 1583
Vroeëre name	Insterburg (1336-1946)
Oppervlakte:
- Totaal	58 vk km
Hoogte bo seevlak	30 m
Bevolking:
- Totaal (2011)	42 220
- Bevolkingsdigtheid	727,9/vk km
Tydsone	UTC +3
Burgemeester	Joeri A. Kowylkin
Amptelike Webwerf	www.inster39.ru

Tsjernjachowsk (Russies: Черняховск; wetenskaplike transliterasie: Černjachovsk; tot 1946 Инстербург; Duits Insterburg, Litaus Įsrutis) is die derde grootste stad in die Russiese eksklawe Kaliningrad-oblast en setel van die stedelike munisipaliteit Tsjernjachowskoje gorodskoje posselenije met 'n bevolking van meer as 42 000.

Die stad, wat in die sentrale deel van die Kaliningrad-oblast by die samevloeiing van die Inster-, Angerapp- en Pissa-riviere geleë is, fungeer as administratiewe setel van die gelyknamige rajon en as ekonomiese sentrum van die streek wat deur bewoners van die oblast met 'n relatief hoë lewensgehalte geassosieer word.

Die vroeëre Duitse stad Insterburg in Oos-Pruise het rondom 'n kasteel ontstaan wat hier in 1336 deur die Duitse Orde as militêre basis vir veldtogte in die aangrensende Litaue opgerig is. Die Litauers het egter twee keer - in 1376 en 1457 - daarin geslaag om die kasteel te vernietig. In 1583 het markgraaf Georg Friedrich stadstatus aan Insterburg verleen.

Die Tatare-inval van 1656 en die opmars van Napoléon Bonaparte se Franse leër teen Rusland in 1812 was van die ergste gebeurtenisse in die geskiedenis van Insterburg. Gedurende die Eerste Wêreldoorlog is die stad tussen Augustus en September 1914 deur Russiese troepe beset sonder dat groot skade berokken is. Eers in die Tweede Wêreldoorlog het 'n Britse lugaanval in 1944 die helfte van die stadsgebied in puinhoop gelê. Op 21 Januarie 1945 is Insterburg deur die Rooi Leër ingeneem.

Die Duitse bevolking is in die volgende jare verdryf en die stadsnaam ter ere van die Sowjet-generaal Iwan Danilowitsj Tsjernjachowski (wetenskaplike transliterasie: Ivan Danilovič Černjachovskij), wat naby Insterburg gesneuwel het, in 1946/1947 na Tsjernachowsk gewysig.