Tsjornobil

in Wikipedia, die vrye ensiklopedie

Чорнобиль • Tsjornobil

Kaart Wapen
Vlag
 Land Vlag van Oekraïne Oekraïne
 Oblast Kiëf
 Stigting 1193
 Oppervlakte:  
 - Totaal - vk km
 Hoogte bo seevlak - m
 Bevolking:  
 - Totaal (2010) 500
 - Bevolkingsdigtheid -/vk km
 Tydsone EET / UTC +2
 - Somertyd EEST / UTC +3
 Burgemeester Mykola Wassylenko
Die Tsjornobil-gebied soos vanaf die Russiese Mir-ruimtestasie gesien in 1997

Tsjornóbil (Oekraïns Чорнобиль [tʃɔrˈnɔbɪlʲ], in Afrikaans veral bekend onder sy Russiese naam Tsjernóbil, 'n transkripsie van Чернобыль [tɕɪrˈnobɨlʲ]) is 'n stad in die landskap Polesië in die noorde van Oekraïne.

Tsjornobil is in die Kijif-oblast geleë, sowat 15 km oos van die grens met Belarus. Die stad was vroeër die administratiewe sentrum van die gelyknamige rajon. Tsjornobil is aan die Pripjat geleë, 'n syrivier van die Dnipro.

Die stad word veral verbind met die kernongeluk wat op 26 April 1986 in die Tsjornobil-kernkragsentrale naby Pripjat, 'n buurstad van Tsjornobil, plaasgevind het en waarna later as die Tsjernobil-kernramp verwys sou word. Pripjat is vandag 'n "spookdorp" en vorm die sentrum van die sogenaamde "Sone", 'n spergebied rondom die bouval van die kernaanleg. Tsjornobil is buite die binnekring van die spergebied met 'n deursnee van 10 km geleë.

In Tsjornobil is talle geboue gerenoveer waarin vroeër werkers en ingenieurs van die voormalige Pripjat-kragkompleks, waarvan die Tsjernobil-aanleg deel uitgemaak het, en soldate, polisie- en brandweerlede gehuisves is. 'n Hotel staan oop vir besoekers. In die stadsgebied en omgewing van Tsjornobil woon tans nog sowat 400 van oorspronklik 14 000 persone wat òf geweier het om die gebied ná die kernramp te ontruim òf later na hul dorpe teruggekeer het. Tsjornobil se oorspronklike bewoners is grotendeels in 'n nuwe stad, Slawoetitsj, hervestig wat vir dié doeleinde gestig is.

Die omgewingsorganisasie Blacksmith Institute het Tsjornobil in 2006, 2007 en 2013 in sy Top Ten Threats-lys, wat jaarliks gepubliseer word, onder die wêreld se tien nedersettings met die ergste omgewingsbesoedeling gereken.[1]

Verwysings[wysig | wysig bron]

Eksterne skakels[wysig | wysig bron]