Umhlanga

in Wikipedia, die vrye ensiklopedie
Spring na: navigasie, soek
Umhlanga
uMhlanga
Umhlanga Rocks se strand en seehoof (pier).
Umhlanga Rocks se strand en seehoof (pier).
Ligging van Umhlanga op 'n kaart (KwaZulu-Natal)
Umhlanga
Umhlanga
Ligging van Umhlanga op 'n kaart (Suid-Afrika)
Umhlanga
Umhlanga
Koördinate: 29°43′31″S 31°5′9″O Koördinate: 29°43′31″S 31°5′9″O
Land Vlag van Suid-Afrika Suid-Afrika
Provinsie KwaZulu-Natal
Metropolitaanse Munisipaliteit eThekwini
Regering
 - Stadraadslid Heinz de Boer (DA)
Oppervlak
 - Stad 16,75 km²  (6,5 vk m)
Hoogte 12 m (39 vt)
Bevolking (2011)
 - Stad 24 238
 - Digtheid 1 400/km² (3 626/myl2)
Tydsone SAST (UTC+2)
Poskode 4319 / 4320
Skakelkode(s) 031

Umhlanga is 'n kusdorp in KwaZulu-Natal in Suid-Afrika langs die Indiese Oseaan. Die dorp is 16 km noord van Durban net langs die N2 nasionale pad geleë. Die dorpsnaam beteken "plek van riete" in isiZulu en is afgelei van die Ohlangarivier wat sowat drie kilometer noord van Umhlanga in die Indiese Oseaan uitmond.

Geskiedenis[wysig]

Die gebied suid van die Tugelarivier is oorspronklik deur San-versamelaars en -jagters bewoon voordat Nguni-groepe, wat onder die heerskappy van koning Shaka in die vroeë 19de eeu tot 'n enkele Zulunasie verenig is, hulle hier gevestig het. Dit het kort daarna onder Britse koloniale bewind gekom. Die huidige dorpsgebied het deel uitgemaak van Sir Marshall Campbell se uitgestrekte plantasie. Campbell, 'n boorling van Glasgow wat in 1850 na Suid-Afrika geïmmigreer het, was 'n invloedryke suikermagnaat wat in 1860 Indiese kontrakarbeiders vir sy plantasie gewerf het. Hulle het tot die streek se multikulturele karakter bygedra.

Umhlanga Ridge (in die voorgrond) en Umhlanga Rocks (in die agtergrond)

In 1869 het Umhlanga se eerste strandhut op 'n rotsagtige deel van die strand ontstaan waar tee en scones aan verbygangers verkoop is. Dit was die begin van Umhlanga se florerende toerismebedryf - nog voor die stigting van die dorp. Maar ook seevaarders het voordeel daaruit getrek. Die strandhut se blink weerkaatsende dak het as baken vir skepe gedien wat sodoende maklik verby Umhlanga se rotsagtige kaap kon seil. In 1895 is Umhlanga deur Sir Marshall Campbell gestig.

Campbell se dogter, Virginia, het in 1920 saam met haar man die eerste hotel in die dorp digby die mond van die Mhlangarivier gebou. Die naam van die rivier beteken: 'die rivier van riete'. Dit was die begin van Umhlanga Rocks as gewilde strandoord en woongebied, en steeds meer hotelle en ander toeristegeriewe is geopen. Sir Marshall het ook riksjas aan Durban bekend gestel. Die strandhut is in die 1930's uitgebou tot die bekende Oyster Box-vyfsterhotel.

Umhlanga het in 1970 munisipale status verwerf, en twee jaar later is die voorstad La Lucia ingelyf by die dorp. Vanaf die 1980's het die dorpsgebied binnelands begin uitbrei. Umhlanga, en hier veral die vroeëre suikerrietvelde van Umhlanga Ridge, het die fokuspunt van ontwikkeling in die Groter Durbangebied geword. Net soos in die geval van Johannesburg, waar besighede hul kantore na die welgestelde voorstad Sandton verskuif het, het ook Umhlanga tot Durban se sakedistrik ontwikkel. In 2010 is Durban se internasionale lughawe na La Mercy verskuif en as Koning Shaka Internasionale Lughawe heropen.

Buurte[wysig]

Umhlanga Rocks[wysig]

Umhlanga Rocks is 'n strandoord met hotelle en woonstelgeboue, waaronder die Cabana Beach-hotel, die Beverly Hills-hotel, die Oyster Box-hotel, die Umhlanga Sands-hotel en die Pearls of Umhlanga-woonstelle. Die meeste geboue bied 'n uitsig oor die strand en die rooi-wit vuurtoring.

Umhlanga Ridge[wysig]

Umhlanga Ridge is 'n nuwe sake- en woonbuurt met winkelgeriewe soos die Gateway Theatre of Shopping-winkelsentrum (een van die grootstes in die land), motorhandelaars, 'n privaathospitaal en talle kantore. Dit het op 'n heuwel ontstaan wat oor die Indiese Oseaan uitkyk en is grotendeels op voormalige plantasiegrond gebou.

In die dorpsentrum, wat deur 'n padnetwerk met grootpaaie soos die N2 verbind word, is nuwe strate met voetgangerlane, parke en openbare ruimtes aangelê.

Omgewing[wysig]

Vuurtoring te Umhlanga Rocks

Die Natalse Haaibeheerraad is in Umhlanga Rocks geleë waar die eerste haainet opgerig is in 1962. Vandag word meer as 400 nette by 46 strande bedien oor 'n afstand van 350 km; vanaf Port Edwardstrand tot by die mond van die Tugelarivier. Die outomatiese vuurtoring by Umhlanga Rocks is in 1953 gebou.

Net noord van Umhlanga het die Breakers-strandoord ontstaan. Dit is digby die Umhlanga-strandmeernatuurbewaringsgebied geleë. Rondom die strandmeer is digte subtropiese kusbosse met wandelpaaie. Die gebied het 'n ryk dierelewe met talle ape, bosbokke en talle voëlspesies. Eweneens noord van Umhlanga het die Sun International-hotelgroep hul kasino- en vermaakkompleks Sibaya Casino & Entertainment Kingdom geopen. Naas die kasino het ook restaurante, kroeë en konferensiegeriewe ontstaan.

Umdloti, langs die strandmeer van die gelyknamige rivier is in vergelyking met Umhlanga, 'n rustiger strandoord met kleiner woonstelgeboue en uitgebreide sandstrande.

Sien ook[wysig]

Bronne[wysig]