Universiteit van Vilnius

in Wikipedia, die vrye ensiklopedie
Universiteit van Vilnius
Universiteit van Vilnius: Die Groot Binneplein

Latyn: Universitas Vilnensis
Leuse:Hinc itur ad astra
Leuse in Afrikaans:Vanaf hier lei die pad na die sterre
Leuse in Engels:From here the way leads to the stars
Gestig:7 Julie 1578
Tipe:Openbare universiteit
Godsdienstige Affiliasie:Sint Johannes Kerk
Rektor:prof. Rimvydas Petrauskas
Personeel:1 353
Studentetal:21 596
Voorgraadse studente:14 890
Nagraadse studente:4 046
Doktorale studente:793
Ander studente:785 (Besturende direkteure in verblyf)
713 (internasionale studente)
Ligging:Vilnius, Litaue
54°40′57″N 25°17′14″O / 54.68250°N 25.28722°O / 54.68250; 25.28722Koördinate: 54°40′57″N 25°17′14″O / 54.68250°N 25.28722°O / 54.68250; 25.28722
Kampus:Stedelik
Kleure:     Maroen
Affiliasies:EUA, Santander Network, UNICA, Utrecht Network
Webtuiste:vu.lt

Die Universiteit van Vilnius (Litaus Vilniaus universitetas, Latyn Universitas Vilnensis) is die grootste universiteit in Litaue en – met stigtingsdatum 7 Julie 1578 – een van die oudstes in Oos-Europa.

Die universiteit bestaan uit twaalf akademiese departemente, agt universitêre institute en tien studie- en navorsingssentra. Die universiteitsbiblioteek in Vilnius is die oudste biblioteek in Litaue. Die universiteit se geriewe sluit daarnaas drie akademiese hospitale, 'n sterrewag, die botaniese tuin, 'n rekenaarsentrum en die universiteitskerk Sint Johannes in.

Geskiedenis[wysig | wysig bron]

Stigting en Pools-Litause periode (1578–1795)[wysig | wysig bron]

Die Universiteit van Vilnius is in 1578 deur die Poolse koning Stefan Batory as Alma Academia et Universitas Vilnensis Societatis Iesu (Vilniusse Akademie en Universiteit van die Sosiëteit van Jesus) met twee fakulteite (filosofie en teologie) gestig en sy status in 1579 deur pous Gregorius XIII bevestig. Dit was die tweede universiteit in die Pools-Litause Gemenebes ná dié van Krakau wat reeds in 1364 ontstaan het en het vir 'n lang tyd as 'n oostelike voorpos in die akademiese landskap van Europa gefungeer.

Die totstandkoming van die plaaslike universiteit was – net soos baie ander nuutgestigte tersiêre instellings van die Jesuïete-orde in die laat 16de en vroeë 17de eeu – aan die Rooms-Katolieke Kerk se aktiwiteite in verband met die Teenreformasie te danke. In die geval van Vilnius is hierdie stap as dringend beskou aangesien talle welvarende lede van die Litause adel reeds aanhangers van die Protestantisme was en 'n Protestantse universiteit in Koningsberg in die naburige land van Pruise al in 1544 gestig is en 'n baie Litause studente en geleerdes gelok het. Die Jesuïete het vervolgens bykomende akademies in Riga, Tartu, Polotsk, Njaswisj en Grodno in die lewe geroep.