Van Stadens-veldblomreservaat
Die Van Stadens-veldblomreservaat naby Gqeberha (voorheen Port Elizabeth) is een van die oudste natuurtuine in die land.
Ligging[wysig | wysig bron]
Hierdie park van ongeveer 600 ha lê 40 km wes van die stad op 'n ou uitspanning aan die bopunt van die Van Stadenspas. Die Van Stadensrivier vorm die wesgrens, die N2- nasionale pad loop deur die terrein en van hier af is daar 'n goeie uitsig oor die kloof van die Van Stadensrivier, die Van Stadensrivierbrug en noordoos na Lady Slipper. Die reservaat is in 1951 gestig en behoort aan die Nelson Mandelabaai Metropolitaanse Munisipaliteit.
Doel[wysig | wysig bron]
Die hoofdoel is om die unieke inheemse plantegroei te beskerm, maar ook om as sentrum vir omgewingsopvoeding te dien. 'n Tradisionele Xhosawoning, huishoudelike artikels, en 'n kraal met plaasgereedskap gee insig in die Xhosa-kultuur. Verder is daar 'n arboretum (boomtuin) en 'n kwekery. Talle wandel-, voetslaan- en bergfietspaadjies en piekniekplekke is aangelê.
Flora en fauna[wysig | wysig bron]
Kaapse fynbos is die natuurlike plantegroei. Daar is talle soorte proteas, orgideë en ericas. Verder ook vetplante en unieke broodbome. Endemies is die Van Stadens-vuurlelie (Cyrtanthus stadensis). Onder die 60 inheemse boomsoorte is die skaars Kaapse kranses, (Atalaya capensis). Dit kom slegs hier en in die omringende berge sowel as by Suurberge voor. Dan is daar ook 'n groot aantal van die wildekastaiing (Calodendrum capense). Uitsonderlik onder die dierelewe is die bedreigde dwergverkleurmannetjie en 'n sekere soort padda. Honderd en sewentig voëlspesies is reeds hier aangeteken.
Rotskuns[wysig | wysig bron]
Daar word algemeen aanvaar dat rotstekeninge die verste suid in Afrika in hierdie park gevind is.
Bibliografie[wysig | wysig bron]
- Logie, Bartle: Governor's travels. A journey along the Kouga/Tsitsikamma coast. Hunters Retreat: Bluecliff, 1999. ISBN 0-620-24152-7
- www.nmbt.co.za
- www.pembba.co.za
- www.vanstadens.co.za