Villa General Belgrano

Villa General Belgrano
Stad
Villa General Belgrano
Koördinate: 31°58′59″S 64°34′0″W
Land	Argentinië
Provinsie	Córdoba
Stigting	11 Oktober 1932
Regering
• Burgemeester	Gustavo Ezequiel Medina
Hoogte	720 m (2 360 ft)
Bevolking
• Totaal	5 888
Tydsone	UTC-3 (ART)
Poskode	X5194
Webwerf	vgb.org.ar

Villa General Belgrano is 'n klein bergdorp in die Departamento Calamuchita van die Argentynse provinsie Córdoba, sowat 75 kilometer noord van die provinsiale hoofstad Córdoba, met 5 888 inwoners. Die dorp lê in die noordelike Valle de Calamuchita, 'n vallei in die bergreeks Sierras de Córdoba, en is vernoem na die skepper van Argentinië se nasionale vlag, generaal Manuel Belgrano (1770-1820).

Geskiedenis

Villa General Belgrano se Oktoberfest in 2006

Die dorp is in die 1930's deur twee Duitse spekulante gestig wat die gebied se landboupotensiaal as belowend beskou het. Die Alpynse landskap en karakter van die dorp het immigrante uit Duitsland, Switserland, Oostenryk en Italië gelok.

Ná die Seeslag van die Rio de la Plata in 1940 het Duitse seemanne hul slagskip Admiral Graf Spee voor die kus van die Uruguaanse hoofstad Montevideo se hawe tot sink gebring, en 130 van die oorlewende matrose het besluit om nie na Duitsland terug te keer nie en hulle in Villa General Belgrano gevestig. Saam met die oorspronklike setlaars het hulle die dorp se kenmerkende voorkoms geskep: Die Alpynse boustyl, houthuise met rooi dakteëls, mikrobrouerye, fynbakkerye en sjokoladewinkels verleen nog steeds 'n tipies Europese karakter aan die dorp. Duits het sy vroeëre status as algemene omgangstaal lankal aan Spaans afgestaan. Eredienste word naas Spaans egter ook nog in Duits gehou, en ook Argentinië se Duitstalige weekblad Argentinisches Tageblatt word by die plaaslike koerantstalletjies verkoop.

Toerisme

As 'n Alpynse enklawe in Argentinië lok Villa General Belgrano talle toeriste wat Duitse spesialiteite soos Apfelstrudel ('n gerolde appelgebak), Leberwurst (lewerwors) en Spätzle kom proe. Die jaarlikse Oktoberfest, die Fiesta de la Cerveza ("Bierfees") in die eerste week van Oktober word as die vierde grootste bierfees van sy soort na dié van die Beierse hoofstad München, Kitchener in Ontario (Kanada) en Blumenau in Brasilië beskou. Ander bekende feeste is die Fiesta de la Masa Vienesa ("Fees van Weense Koeke en Terte") en die Sjokoladefees.

Eksterne skakels

• Die amptelike webwerf van Villa General Belgrano (Spaans)